Eqqakkanik assartuussisarneq aallunneqarnerulerpoq

Illoqarfinni minnerni nunaqarfinnilu eqqakkanik passussisarneq pitsaanerulersinniarlugu kommunit tamarmik Naalakkersuisunit tapersersorneqarlutik sulianik aallartitsipput, nunaqarfinniit illoqarfinniillu eqqakkanik illoqarfinni eqqagassalerivinni annerusuni suliarineqartussanik assartuussisarnermut tunngasunik.

Eqqakkat eqqortumik poortorneqarpata assartorneqarpatalu assersuutigalugu eqqakkat plastikkit eqqakkallu allat silaannakkut pinngortitamut imaanullu siaruarsinnaanerat annikillissaaq.

Eqqagassalerineq kommunit akisussaaffigaat, kisiannili Naalakkersuisut kommuninut ikiorsiiniarlutik eqqakkanik assartuinermi misileraanissanut arlalinnut atugassatut 7,3 millioner koruunit aningaasaliissutigaat. Kommune Kujalleq Narsamiit, Igalikumiit aamma Qassiarsummiit Qaqortumut eqqakkanik assartuinissamut tapersiiffigineqarpoq. Qaasuitsup Kommunia Qeqertarsuarmiit Aasiannut eqqakkanik assartuussineqarpoq taamatullu suliniummut ataatsimut tapersiiffigineqarpoq, kiisalu Qeqqata Kommunia Kangaamiuniit Sarfannguaniillu Maniitsumut Sisimiunullu eqqakkanik assartuussinermik misiliinissamut tapersiiffigineqarluni. Kommuneqarfik Sermersuumi Kapisilinniit, Qeqertarsuatsiaamiit, Arsummiit Tasiilamiillu Nuummut assartuussinermi suliassanik suliaqartoqarpoq.

Assartuussinermi suliassarpianut tapersiinerup saniatigut aamma Naalakkersuisut kommunini tamani immikkut sulisumik avatangiisinik suliaqartussamik ukiuni marlunni atorfeqartitsinissamut tapersiissuteqarput. Sulisut avatangiisinik suliaqartussat nutaat eqqakkanik assartuussinermi aaqqiissutissanik suliaqassapput, aammalu kommunit akimorlugit avatangiisini misilittakkanik avitseqatigiinnissap annertusineqarnissaa qulakkiissallugu. Tamatuma saniatigut sulisut avatangiisinik suliaqartussat illoqarfinni nunaqarfinnilu eqqiluisaarnissamut maleruagassat malinneqarnissaat qulakkeereqataaffigisassavaat. Minnerunngitsumik suliffeqarfiit, sanaartorfiit, sullissiviit inissiallu nalinginnaasut.

Annertunerusumik paasisaqarusunnermi immikkoortortaqarfimmi pisortaq Karen Anne Arleth, tlf.: +299 345465-imut, e-mail: knar@nanoq.gl, attaveqarfigineqassaaq.