Naalakkersuisut Great Greenlandip QR-Code-mik puisit amiinik tunisassanianut meqqilersuiniarnera tapersersorpaat

Great Greenland logo

 

Aalisarnermut Piniarnermullu Naalakkersuisoq Karl-Kristian Kruse EU-p iluani arlalinnik sapaatip akunnerata tulliani ataatsimeeqateqassaaq Great Greenlandip puisit amiinik tunisassianut QR-Code-mik meqqilersuisalernissaanut EU-mut saqqummiunneqarnissaanut atatillugu.


Nunanut EU-mut ilaasortanut Inuit puisinniartarnerat puisillu amiinik tunisassiat nuiffatigineqarsinnaanerannut pisinnaatitaaffeqarneq pillugu isumasioqatigiinnerni siunertaavoq QR Code-mik meqqilersuinissamut suliniut aalajangiisartunut attuumassuteqartunullu allanut ilisimatitsissutiginissaa. Ilutigalugulu siunertaavoq Inuit puisinniartarnerat inatsisinik eqquutsitsinerusoq aammalu EU-mi peqqussutip 2015-imeersup naapertorneqarnera kiisalu puisinniarneq imminut nammassinnaasumik tunngaveqartoq pillugu ilisimasanik ingerlatitseqqiinerussalluni.

QR-Code-mik meqqilersuinerup ersarissumik takutissinnaassavaa puisit amiinik tunisassiassat Inuit puisittaanneersuusut aammalu EU-mi niuffannermi piumasaqaataasunik naapertuuttuusut.

Isumasioqatigiinnerni Karl-Kristian Kruse-mit, Great Greenland-imit, EU Kommissionianit, KNAPK-mit, Pinngortitaleriffimmit, NAMMCO-mit kiisalu WWF-imit saqqummiisoqassaaq. Pineqartut saniatigut EU Parlamentimut ilaasortanik aamma EU Kommissionimeersunik kiisalu Bruxelles-imi qallunaat aallartitaqarfianneersunik immikkut ataatsimeeqateqartoqassaaq.

Tunisassianik puisineersunik EU-mut eqqusseqqusiunnaarnerli siulleq 1983-imeersup, kingornalu sukaterinerit 2009 aamma 2015-imeersut atuutilermata, tunisassiat puisineersut nunanut EU-mi ilaasortanut niuerneq annertuumik appariarsimavoq, naak Inuit immikkut pineqaraluartut. Taamaattumik qaammarsaalluni suliniutip aamma siunertaraa tunisassiat puisineersut niuffatigineqarnerisa makiteqqinneqarnissaat.

Sukumiinerusumik paasisaqarusukkaanni immikkoortortaqarfimmi pisortaq Amalie Jessen attavigiuk, oqarasuaat 34 53 04, e-mail: Amalie@nanoq.gl