Sermitsiaq.AG-p allaaserisaannut erseqqissaassut

All.: Karl-Kristian Kruse, Namminiilivinnermut, Nunanut Allanut Nunalerinermullu Naalakkersuisoq

Sermitsiaq.AG-p allaaserisaannut: ” Embedsbolig til Vivian Motzfeldt” (ilanngussaq kalaallisuunngortinneqarsimanngimat qallunaatoortaa ilanngunneqarpoq) novembarip 20-iani 2017 saqqummersumit erseqqissaassut, aammalu allaaserisamut novembarip 21-iani 2017 saqqummersumut: ”Isumalioqatigiissitami ilaasortat maanna akissarsiaqaleriasaassapput”.

Sermitsiaq.AG marlunnik allaaserisanik saqqummiivoq qulequtaqartut:

Embedsbolig til Vivian Motzfeldt” (ilanngussaq kalaallisuunngortinneqarsimanngimat qallunaatoortaa ilanngunneqarpoq) novembarip 20-iani 2017 saqqummersoq aammalu allaaserisaq novembarip 21-iani 2017 saqqummersoq “Isumalioqatigiissitami ilaasortat manna akissarsiaqaleriasaassapput”. Allaaserisani taakkunani allaaserineqarpoq Tunngaviusumik Inatsisissaq Pillugu Isumalioqatigiissitami siulittaasoq Nuummi initaarniartoq. Aammalu Isumalioqatigiissitami ilaasortat sulinerminnut atatillugu akissarsiaqalissasut.

Tassunga atatillugu erseqqissaassutigineqartariaqarpoq, Tunngaviusumik Inatsisissaq Pillugu Isumalioqatigiissitap kissaataa malillugu isumaqatigiittoqarsimammat, Naalakkersuisut Aningaasaqarnermut Akileraartarnermullu ataatsimiititaliamut koruuninik millionit affaanik akuersissuteqassasut. Aningaasallu pineqartut Tunngaviusumik Inatsisissaq Pillugu Isumalioqatigiissitamut aammalu taassuma allattoqarfiata aningaasaliivigineqarnerinut qaffaassutitut atorneqassapput. Aningaasallu taakku Tunngaviusumik Inatsisissaq Pillugu Isumalioqatigiissitap ilaasortaasa akissarsiaattut, aammalu Allattoqarfiup nukittorsarnissaanut taamatuttaaq siulittaasup Nuummi atorfilittut inissaanut atorneqarsinnaapput, taamalu Tunngaviusumik Inatsisissaq Pillugu Isumalioqatigiissitap suleriusitut tunaartarisaanut ilassutitut ikkunneqassalluni.

Taamatut Naalakkersuisut piginnaatitsinerat Tunngaviusumik Inatsisissaq Pillugu Isumalioqatigiissitap suleriarnissaanut nukittorsaataassaaq, taamaalillunilu qulakkeerneqarluni Isumalioqatigiissitap Inatsisissatut siunnersuummut atatillugu missingiutitut suliassani 2018-mi naammassisassani pitsaasumik naammassiniarumaaraa. Aningaasalli pineqartut siunertanut taakkununnga atorneqarnissaat massakkorpiaq suli aalajangiunneqarsimanngillat. Taamatuttaaq oqaatigineqanngilaq pinngitsoorani akissarsiatut inimilluunniit atugassiinermut aningaasat atorneqassasut. Sinaakkusiinerliuna uani pineqartoq siunertatut taakkartorneqartunut aningaasat atorneqarsinnaallutik Tunngaviusumik Inatsisissaq Pillugu Isumalioqatigiissitap kissaatai pisariaqartitaalu tunngavigalugit.

Taamatut pisinnaatitsineq tunuliaquteqarpoq Tunngaviusumik Inatsisissaq Pillugu Isumalioqatigiissitap kissaatigalugu erseqqissaatiginikuummagu siulittaasortik suliaqarluni siulittaasutut sulissammat. Taamatuttaaq Isumalioqatigiissitamit erseqqissaatigineqarpoq Allattoqarfik nukittunerusumik ingerlassappat atorfinittussaareersut saniatigut inummik atorfinittussamik ataatsimik amigaateqartoq. Koruuninik millionit affaanik aningaasaliisoqarneratigut pingaartitat tulleriaartariaqassapput, tigussaasumillu atuilersoqartinnagu aningaasat qanoq atorneqarnissaat pillugu Naalakkersuisut Isumalioqatigiissitallu akunneranni isumaqatigiissuteqartoqaqqaassaaq taamalu aamma Inatsisartut Aningaasaqarnermut Akileraartarnermullu ataatsimiititaliaanit akuersissutigineqaqqaassalluni.

Sermitsiaq.AG-p aningaasaliisoqarnera pillugu marlunni allaaseraa, taannalu pissutaalluni aningaasat koruunit millionit affaat marloorpasilerlutik.  Taakkulu akissarsiassatut inissamillu atorneqassasut allaaseralugu. Tamannali inissaminiinngimmat Naalakkersuisut erseqqissaassutigerusuppaat, Naalakkersuisut koruuninik millionit affaannik sinaakkusiimmata, taakkulu aningaasat siunertanut arlalinnut ataatsimulluunniit atorneqarsinnaasutut naatsorsuutigineqarput.

Naggataatigut erseqqissaassutigineqassaaq, Tunngaviusumik Inatsisissaq Pillugu Isumalioqatigiissitap taassumalu Allattoqarfiata aningaasalerneqarsimanera 2017-mi katillugu 5,5 mio. koruuniummat 2018-milu 5,526 mio. koruuniullutik. Taamalu 2018-mi tapiissutit 0,5 mio koruuninik qaffanneqarsinnaatitaallutik. Taamatuttaaq Naalakkersuisut ilisarisinnaanngilaat Sermitsiaq.AG-p allaaserisaa, allaaserineqarmat Isumalioqatigiissitaq aningaasaliissutaareersut qaavatigut 750.000 koruuninik ilaneqarsimasut.