Avatangiisimik Pinngortitamillu Mianerinninnermut Nersornaat Qaqortumi tunniunneqarpoq

Avatangiisimik Pinngortitamillu Mianerinninneq pillugu 2017-imi Nersornaat Qaqortumi tunniunneqarpoq

Namminersorlutik Oqartussat Avatangiisimik Pinngortitamillu Mianerinninneq pillugu Nersornaataat 2017-imi tunniunneqartoq siulleq ullumi marlunngornermi novembarip 21-anni Benjamin Adolfsen-imut tunniunneqarpoq, taanna nammineq kajumissutsiminik cigaretsit kimmivikuinik Qaqortumi katersuisimavoq..

Avatangiisimik Pinngortitamillu Mianerinninneq pillugu Nersornaammik ullumi tunineqartoq sineriak tamakkerlugu inunnit 249-nit innersuunneqarpoq, taakkunannga 205-it Qaqortumi atsiortitsinerminngaanneersuullutik. Pinngortitamut Avatangiisinullu Naalakkersuisoqarfik ukioq manna siusinnerusukkut suliffeqarfiit, kattuffiit inuillu ataasiakkaat eqqakkanik katersinermik imaluunniit eqqagassaqarnaveersaartitsinermik immikkuullarissumik suliniuteqartut pillugit innersuussisoqarnissaanik kaammattuuteqarpoq, tamatumalu kinguneranik innersuussutit 255-it tiguneqarput. 

Naalakkersuisut siulittaasuat Kim Kielsen Qaqortumut ullumikkut tikinngitsoormat, Naalakkersuisut siulittaasuat sinnerlugu Kommune Kujallermi borgmesteri Kiista P. Isaksen Namminersorlutik Oqartussat Avatangiisimik Pinngortitamillu Mianerinninneq pillugu Nersornaataannik Benjamin Adolfsen-imut tunniussisuuvoq. Kiista P. Isaksen oqalugiarnermini oqaatigaa, taamatut nersornaasiisarneq 2007-imi pisalermalli inuup aalajangersimasup ataatsip nersorniarneqarnissaanik innersuussutigineqartut aatsaavissuaq taama amerlatigisut.

Qasusuillutit sila qanoq ikkaluarangalluunniit akissarsinissaq siunertarinagu cigaretsit kimmivikuinik katersuiuartarsimavutit. Taama iliuuseqarsimanerit nunatsinni innuttaaqaterpassuavit arajutsisimanngilaat, tamannalu pillugu pinngortitamik avatangiisinillu mianerinninnissaq siunertaralugu inuiaqatigiinnut maligassiulluarnerit pillugu nersorniarneqarnissat inuit 249-t kissaatigisimavaat. Inuppassuit taama kissaateqarnerat Naalakkersuisut isumaqataaffigigamikku malikkususimavaat”, Kiista P. Isaksen Kim Kielsen sinnerlugu oqalugiarnermini Benjamin Adolfsen-imut oqarpoq.

Namminersorlutik Oqartussat Avatangiisimik Pinngortitamillu Mianerinninneq pillugu Nersornaataat tunniunneqartarpoq inunnut, suliffeqarfinnut kattuffinnulluunniit tamatsinnik pinngortitamik avatangiisinillu mianerinninnissamik ilisimaarinnilersitsisunut, imaluunniit Kalaallit Nunaanni suliniuteqarnermikkut avatangiisitsinnik pinngortitamillu pitsanngorsaataasumik iliuuseqarsimasunut.

Avatangiisimik Pinngortitamillu Mianerinninneq pillugu 2017-imi Nersornaataat 25.000 kroninik aningaasartaqarpoq.   

Sukumiinerusumik paasisaqarusuttut attavigisinnaavaat:

Naalakkersuisumut allatsi, Nuka Møller, tlf.: 562450, email: nume@nanoq.gl

Immikkortortaqarfimmi pisortaq, Karen Motzfeldt, tlf.: 346019, email: karm@nanoq.gl