Aalisartut piniartullu ullorsiornissinni pilluaritsi

Karl-Kristian Kruse, Aalisarnermut Piniarnermullu Naalakkersuisoq

“Aalisartut piniartullu, taakkulu ilaqutaasa ullorsiorneranni Naalakkersuisut sinnerlugit pilluaqquakka.

Nunatsinni aalisartoq piniartorlu kinaagaluarnersoq pilluaqqorusuppakka. Aamma KNAPK 73-inik imikkoortortaqartoq pilluaqqorusuppara.

Meeraallungali Niaqornami aalisartortavut piniartortavullu nuannaartorisimavakka, taakkuummata nunaqarfitta avatinnguani pisaminnik ullut tamaasa nerisassaqartitsiuartuusut.

Aalisartutut piniartutullu inuussutissarsiut, inuttaminut piumaffiginnittorujussuuvoq.

Aalisartutut piniartutullu aalajaalluni ingerlatsinngikkaanni ilaqutaasut qaninnerit inuutissallugit ajornaatsuinnaaneq ajorpoq, ingammik inooqataasoq aalajangersimasumik suliffeqanngippat. Aalisartuussagaannimi piniartuussagaanniluunniit eqiasuitsuusariaqarpoq.

Nunatsinni aalisartut eqiasuitsut aalisakkanik amerlanerusunik aalisaleruttorfiit nalaanni tuniserusukkaluartunut killeqartitsiuarnerit suli amerlavallaarujussuaqaat.

Isumaqarpunga tunitsivigitinneqartut amerlanerusinnaagaluartut, nunaqarfiit ilaanni aalisartut pisatik nunaqarfinnut anginerusunut illoqarfinnulluunniit namminneerlutik assartortariaqarmatigit.

Pissutsit taamaatut qanimut takuakka Kangaatsiamut, taassumalu nunaqarfittaanut aasaq manna angalagama. Qularutissaanngilaq nunaqarfinni pineqartuni eqeersimaartunik eqiasuitsuinillu aalisartoqarmat, ajoraluartumilli tamakkiisumik aalisarsinnaanngitsunik.

Aamma aalisaleruttorfiup nalaani tunisinerit killilersorneqalersarput, Royal Greenlandimit nunaqarfinni tunitsiviit naammattunik qerititsivilersorneqarsimanngimmata. Killilersuinerit ukiut tamaasa pisartarmata Royal Greenlandip pissutsit taakku piaartumik aaqqiivigisariaqalerpai.

Aalisarnermut inatsit

Naalakkersuisoqatigiinnissamut isumaqatigiissut tunngavigalugu Naalakkersuisut sulisussaapput. Isumaqatigiissutip pingaarnersaasa ilaat tassaavoq aalisarnermut inatsisip naammassereerneqarsimanissaa.

Inatsisartut aalisarnermut inatsisissatut siunnersuummi qulequttat pingaarutillit aqagu, sisamanngornermi novembarip 16-ianni oqaluuserisussaavaat.

Neriutigilluinnarpara siunnersuut Inatsisartut kinguneqarluartumik oqaluuseriumaaraat.”

Attavigineqarsinnaavoq Aalisarnermut Piniarnermullu Naalakkersuisoqarfimmi pisortaaneq, Jørgen Isak Olsen. Email: jio@nanoq.gl