Imigassaq pillugu inatsisip oqallisigineqarnerani eqqunngitsunik paasissutissiineq

Allattoq: Agathe Fontain, Peqqissutsimut Naalakkersuisoq

Niuertarfiit imigassamik aalakoornartortalimmik tuniniaanikkut isertitaqartartut imigassaq pillugu inatsimmik nutaamik qinikkat akuersinissaat pinngitsoortinniarlugu ilungersuuteqarput. Kingullermik suliffeqarfiit kattuffiat Sulisitsisut oqaatigaat inatsisissaq nutaaq siunertarisamisut sunniuteqarnavianngitsoq. Tamatumunnga Sulisitsisut tunngavilersuutigaat Sverigemi inatsimmut assingusup kingunerisaanik imigassamik aalakoornartortalimmik atuinerulersimanera.

Taama oqarneq uannut tupaallannarpoq. Kisitsisillu pissarsiakka malillugit atuineq ukiuni kingullerni appariartuuteqarpoq.

Sverigemi atuineq annertuseriaateqanngilaq
Sverigemi imigassamik aalakoornartortalimmik ukiuni kingullerni qulini atuineq tamarmiusoq 8 procentimik annikilleriaateqarpoq. Kisitsisini taakkunani tunngavigineqarput ”atuinerup pisortatigoortumik nalunaarsorneqarnerata” aammalu ”atuinerup nalunaarsorneqanngitsup” akornanni agguataarineq. Atuineq nalunaarsorneqanngitsoq piffissami sivisuumi allannguuteqarpianngilaq, ukiulli 7-it kingulliit ingerlaneranni appariaateqarluni aammalu nalunaarsorneqanngitsut – tassalu killeqarfimmi niuffanneq, anngiortumik eqqussuineq immiornerlu – ukiut qulit kingulliit ingerlaneranni 21 %-imik appariaateqarput. Kisitsisit nalunaarusiamit ”Alkoholkonsumtionen i Sverige 2016” imigassaq aanngajaarniutillu pillugit paasissutissiisarnermut Sverigemi qitiusumik ingerlatsiveqarfimmit suliarineqartumeersuupput.

Aammalumi nunatsinni imigassaq pillugu inatsisissamut nutaamut siunnersuutip Sverigemi pissutsinut sanilliunneqarnissaa isumassaqanngikkaluarpoq. Tassalu Sverigemi – Sulisitsisut namminneq allannerattut – imigassat aalakoornartortallit nioqqutissanut allanut akuutinnagit ukiorpassuarni assiaqusersorneqartarmata – tassalu 1955-imi Systembolaget aallartinneqarmalli – tamatumani pineqarlutik niuertarfiit naalagaaffimmit pigineqartut imigassamik aalakoornartortalimmik nioqquteqarnissamut kisermaassisut. Taamaalillunilu tamatumunnga atatillugu Sverigemit nutaarsiassaqanngilaq. Taamaattorli soqutiginartua tassaalluni kisermaassisussaatitaaneq Sverigemi imigassamik aalakoornartortalinnik atuineq 29 procentimik annikillisissimagaa Sverigemi peqqinnissakkut oqartussaasut naliliimmata – tamatumani imigassamik aalakoornartortalimmik niueruteqarnermi kiffaanngissuseqarluni unammilleqatigiittoqarsinnaaneranut sanilliullugu.

Assiaqusersuinissaq kisermaassisussaatitaanermut attuumassuteqanngitsoq
Imigassamik aalakoornartortalimmik niueruteqarnerup kisermaassilluni ingerlanneqarnissaata siunnersuutiginissaa imigassaq pillugu inatsisissamut nutaamut siunnersuummi Naalakkersuisut siunertarinngilaat. Siunissami niuertarfiit nalinginnaasut imigassamik aalakoornartortalimmik niueruteqarsinnaassapput. Taamaallaalli imigassat aalakoornartortallit niuertarfimmi nioqqutissat allat akornanniinnatik assiaquserneqaannartussaallutik.

   
Angusaqarfiulluartumik suleqatigiinnissap neriuutigineqarnera
Suliffeqarfiit ilaasortaasut nunatsinni imigassamik aalakoornartortalimmik atuinerup pitsaaliorneqarnissaa pillugu Sulisitsisut Sermitsiaq.Ag-mi kaammattuuteqarmata nuannaarutigaara. Tamannalu qilanaaraara pisariaqartinneqarluinnarmat. Suliffeqarfiit taakku soorunami ammasumik tatiginneqatigiiffiusumillu naapikkusuppakka. Amigaataaginnarpoq paasissutissat tunngavigalugit oqaloqatigiinnissaq.

Annertunerusumik paasissutissat naalakkersuisup allattaanut Nauja Møllerimut, mobil: +299 58 26 54 imaluunniit e-mail: nmoe@nanoq.gl saaffiginninnikkut pissarsiarineqarsinnaapput.