Aatsitassarsiorneq siuariartorpoq

Råstof

Nunatsinni aatsitassarsiornermit nuannersumik nutaarsiassaqarpoq. Siuariartortoqarpoq

Qeqertarsuatsiaat eqqaanni Greenland Ruby A/S-ip aatsitassarsiorluni ammarnerata, nunatta nunanut aatsitassarsiornermik ingerlatsiviusunut ilannguteqqinnera takutippaa. Peqatigisaanillu aatsitassarsiornermik suliniutit arlallit ukiuni aggersuni tunisassiornermik aallartitsiniarlutik sulinialeruttorput. Aasap ingerlanerani nunatsinni piffinni tamani aatsitassanik misissuinerit arlallit aamma ingerlanneqarput. Suliniutit annertuut ilaat Maniitsup eqqaaniittoq North American Nickel-ip ingerlaataa qilleriffinni 23-ini 8776 meterinik takissuseqartunik misissugassanik qaqitsivoq.

Peqatigisaanillu annikitsumik aatsitassarsiornermik akuersissutit amerleriapiloorput. Ukiup kingulliup ingerlanerani annikitsumik aatsitassarsiornissamik akuersissutit 24-it missaanniittut tunniunneqarput. Taamaammallu 2016-imut sanilliullugu 2017-imi annikitsumik aatsitassarsiornermut akuersissutit 18 procentinik amerlanerupput.

Aatsitassarsiornermullu tunngasumik allaffissornermi ingerlatsineq aamma pitsanngoriarpoq. Misissueqqaarnissanut misissuinissamullu akuersissutinik suliarinnittarnerit 2016-imit 2017-imut sanilliullugu 49 procentimik sivikillisinneqarput, taamaalillunilu maanna ullut 60-it ingerlaneranni isumagineqartalerlutik. Annikitsumillu aatsitassarsiornermut atatillugu allaffissornikkut sulianik ingerlatsineq 60 procentimik sivikillisinneqarpoq, taamaalillunilu maanna ullut 72-it suliarineqartalerlutik.

Aatsitassanut Ikummatissanullu Naalakkersuisoq aatsitassarsiornermi ineriartornermik pitsaasumik iluarisimaarinnittoq ima oqarpoq:

Innuttaasunut tamanut iluaqutsiisumik aatsitassarsiornermik ingerlalluartumik pilersitsinissaq pingaartippara. Taamaammallu aatsitassarsiornerup ukiuni makkunani siuariartornera annertuumik nuannaarutigaara.

Aatsitassarsiornermut tunngasuni siuariartoqqinnissaq anguniarlugu Aatsitassanut Ikummatissanullu Naalakkersuisoq suliniutinik arlalinnik aallartitsivoq. Suliniutit taakku kiisalu aatsitassarsiornermik suliniutit allat ukiuni kingullerni ingerlanneqartut arlallit pillugit sapaatip akunnerani uani Sermitsiami allaaserisaq, Aatsitassanut Ikummatissanullu Naalakkersuisup allaaserisaani atuarsinnaavatit.

 

Paasissutissat annertunerusut pissarsiarineqarsinnaapput:

Jane Petersen Lantz
Naalakkersuisup allattaa – Aatsitassanut Ikummatissanullu Naalakkersuisoqarfik
tlf: 346839, e-mail: japl@nanoq.gl

Jørgen T. Hammeken-Holm
Naalakkersuisoqarfiup pisortaa – Aatsitassanut Ikummatissanullu Naalakkersuisoqarfik
tlf: 346846, e-mail: joeh@nanoq.gl