Kinami kalaallit aalisagaataat pisiarineqarumanerujartuinnartut

Naalakkersuisut Siulittaasuat Kim Kielsen, Inuussutissarsiornermut, Niuernermut Nukissiuuteqarnermullu Naalakkersuisoq Hans Enoksen aamma Aalisarnermut Piniarnermullu Naalakkersuisoq Karl Kristian Kruse novembarip aallaqqaataani Kinap sineriaani illoqarfissuit ilaat Qingdao Royal Greenland A/S, Polar Seafood A/S aalisakkanillu Nunatsinnit tuniniaasartut allat peqatigalugit kalaallit aalisagaataannik tuniniaajartoqataaffigaat. Maanna Namminersorlutik Oqartussat aalisakkanillu Nunatsinniit tuniniaassartut tuniniaasarneq attatiinnarniarlugu annertusarniarlugulu peqatigiillutik ukiut aappassaat suleqatigiipput.

Kina nunarsuarmi aalisakkanik pisisartut annersaraat, Nunatsinniillu aalisakkanik tuniniaavittut pingaaruteqartuuvoq. Nunatta Kinamut aalisakkanik tuniniaasarnera aatsaat taama annertutigilerpoq. Nunatsinniit aalisakkanik tuniniaasartut ilisimatitsissutigaat maanna ukiumut 1,3 milliard kronit miss. Kinamiunut tuniniaasoqartartoq.

Novembarip aallaqqaataani aamma Polar Seafood A/S aamma Royal Greenland A/S aaqqissugaanut Kinami aalisakkanik pisisartunut ilasseqatigiinnermut Naalakkersunut ilaasortat peqataapput.

Novembarip aappaani kalaallit angalasut nunarsuarmi aalisakkat pillugit nittarsaavissuit annersaannut China Fisheries & Seafood Expo-mut peqataapput, tassani aamma kalaallit tuniniaasartutoqarfiit naapippaat.

Royal Greenlandip pisortaata Mikael Thinghuusip Polar Seafoodillu siulersuisuisa siulittaasuata Henrik Lethip tunisassiaminnik annerpaamik pisisartut Naalakkersuisut Siulittaasuannut Naalakkersuisunullu ilaasortanut ilisaritippaat.

China Fisheries & Seafood Expo Qingdaoimi pisoq Asiami aalisakkanik qalerualinnillu tuniniaavissuit nunarsuarmi annersaraat. Tassani nunat 100-t sinnerlugit tuniniaasarput. Tuniniaanersuarmi tassani ukioq manna alakkaasut katillugit 28.000-iusimapput.

Ulloq taanna kingusinnerusukkut Naalakkersuisunut ilaasortat aamma Qingdaoip borgmesteria Meng Fanli, Qingdaoimilu kommunalbestyrelsemut ilaasortat suleqatigiissinnaanermut periarfissat eqqartorniarlugit naapipput.

Kinami pisortatigoortumik angalaneq tallimanngornermi naammassissaaq, tassani China Starfish kalaallit aalisagaataasa Kinamut tuniniagassanngorlugit piareersarnerinut isumaginnittartut pulaarneqassapput. China Starfiship Royal Greenland aamma Polar Seafood suleqatigaat. 

 

 

Annertunerusumik paasisaqarusukkuit uunga saaffiginnissinnaavutit:

Naalakkersuisoqarfimmut pisortaq Jacob Isbosethsen på +45 31573412.

Naalakkersuisoqarfimmut pisortaq Jørn Skov Nielsen på +299 556188.