Nunat Avannarliit Ministeriisa Siunnersuisoqatigiiffiata issittoq pillugu pilersaarutaa 2018-2021 Nunat Avannarliit Siunnersuisoqatigiiffiata ataatsimiinnerani saqqummiunneqarpoq

Nunat Avannarliit Ministeriisa Siunnersuisoqatigiiffiat issittoq pillugu suleqatigiinnissamik 1996-imili pilersaarusiortalerpoq, pilersaarut massakkut atuuttoq (2015 – 2017) ukiup naanerani atorunnaassaaq tamatumalu kingunerisaanik pilersaarummik nutaamik saqqummiinissaq piffissanngorsimalluni.

Nunat Avannarliit Siunnersuisoqatigiiffiata ullormi kingullermi 2. november ataatsimiinnerani Nunat Avannarliit Ministeriisa Siunnersuisoqatigiiffiata issittoq pillugu pilersaarut nutaaq: “Nunat Avannarliit Issittoq pillugu Suleqatigiinnerat” Nunat Avannarliit Siunnersuisoqatigiiffianit akuerisassanngorlugu saqqummiuppaat.

Suleqatigiinnissamut isumaqatigiissummi nutaami issittumi pisariaqartitat immikkut ittut akuerineqarnissaat sallersaatillugu ukkatarineqarpoq, pilersaarutip saniatigut ilutigisaanik FN-ip 2030 angunigaa aammalu nungusaataangitsumik ingerlatsinissamut anguniakkat 17-it aallaavigalugit sulisoqassalluni.

Nunat Avannarliit Ministeriisa Siunnersuisoqatigiiffiata allattoqarfia Nunanut allanut immikkoortortaqarfik peqatigalugu februarimi pilersaarutip suliarineqarneranut atatillugu pilersaarutissaq pillugu Nuummi tusarniaapput. Tusarniaaneq soqutiginnittut arlallit takkussimapput pilersaarullu nutaaq soqutigineqaqaluni, tamannalu Kalaallit Nunaata sammineqartumik pimoorussineranik ersersitsivoq.

Suleqatigiinnissamut pilersaarut nutaaq ataatsimeersuarnerup nalaanni Finlandimiut suleqatigiinnissamut ministerianit saqqummiunneqarpoq, Peqqissutsimut Nunanullu Avannarlernut Naalakkersuisorlu minutsini marlunni oqaaseqarnissaminut periarfissinneqarluni.

Issittoq pillugu pilersaarummut tunngatillugu Naalakkersuisoq ima oqarpoq: “pilersaarutip nutaap inernera naammagisimaartorujussuuvara. Naalakkersuisuni pingaartilluinnakkatta tassalu inuit issittumi najugallit ukkatarineqalersimanerat ersarissorujussuuvoq, suliniutissarpassuillu pilersaarut aqqutigalugu ukiuni aggersuni ingerlanneqartussat  nunatsinnit peqataalluarfigineqarnissaat qilanaarilereerpara.” (issuaaneq naavoq).

Annertunerusumik paasisaqarusukkuit Naalakkersuisup allattaa Nauja Møller, e-mail: nmor@nanoq.gl oqarsuaat: +299 582654 / +45 31405792 imaluunniit AC Fuldmægtig Monika Paulli Andersen e-mail: mopa@nanoq.gl oqarasuaat: +299 553320 / + 45 51640373 inussiarnersumik attavigineqarsinnaapput.