Nunat Avannarliit Siunnersuisoqatigiiffiata sapaatip akunnerani uani Helsinkimi ataatsimiinnerani statsministerit ataatsimiinneranni EU aamma Nunat Avannarliit sammineqarput

Statsministerit ataatsimiinneranni Naalakkersuisut Siulittaasuannut tullersorti siulleq Sara Olsvig peqataavoq

Nunat Avannarliit nunarsuarmi nunani akuulersitsisimanerpaatut inissisimalernissaat Nunani Avannarlerni statsministerit anguniagaraat. Nunani Avannarlerni Ministerit siunnersuisoqatigiiffiata killeqarfinni akornutit nungusinneqarnissaat ukiuni kingullerni annertuumik sulissutigisimavaat. Suliaq tamanna Kalaallit Nunaata Killeqarfinni akornutit pillugit siunnersuisoqatigiit  aqqutigalugit toqqaanartumik suleqataaffigisimavaa.

Qarasaasianik atuinerulernissaq anguniarlugu ministerit siunnersuisoqatigiiffiata suleqatigiissitamik suligasuartussamik pilersitsisimanera statsministerit tamarmik iluarisimaarpaat. Pisortani aqutsissutissanik nutaanik ineriartortitsisoqartillugu killeqarfinni akornutissanik nutaanik pilersitsisoqannginnissaata qulakkeerneqarnissaa ministerit siunnersuisoqatigiiffiani suliassaavoq pingaarutilik.

Nunani Avannarlerni Europamilu qarasaasiat aqqutigalugit aaqqissutissanik ineriartortitsisarnerit periarfissat ilagisariaqarpaat. Taamaasiornikkut nunat sanilerisavut qarasaasiaq aqqutigalugu pitsaasumik attaveqaqatigiittarnerit qulakkeersinnaassavavut. Tassunga ilanngullugu Kalaallit Nunaata Avannaani Tunumilu satellit internetilu  aqqutigalugit  attaveqaatit pitsanngorsartaqarpavut. Suliassaq taanna nunap kialluunniit kisimiilluni naammassisinnaanngilaa. Tamanna Nunanit Avannarlernit nunallu tamalaat suleqatigiissutigisariqarpaat” Sara Olsvig oqarpoq. 

EU eqqarsaatigalugu isumaqatigiissutit nunani avannarlerni nunanut EU-mut EØS-mullu ilaasortaasut akornanni isumaqatigiissutaasut sulilu atuuttut EU-p peqqussutaanik maleruagassaanillu nutaanik taarserneqartartillugit ajornartorsiutit pilertarput.

Tamanna suliffeqarnermut tunngatillugu takussutissaqartinneqareerpoq peqqinissamut tunngatillugu ilinniartitaanerit pillugit nunat avannarliit isumaqatigiissutaat akuerisaasoq EU-p inatsisaanit Kalaallit Nunaata peqataaffiginngisaanik nutaanik taarserneqarmat.  Tamatuma kingunerisaanik suliassaq taanna pillugu nunat avannarliit isumaqatigiissutaata attatiinnarneqarnissaa Kalaallit Nunaata sulissutigisariaqarpaa, taamaasiornikkut kalaallit peqqinnissaqarfimmi sulisut Nunani Avannarlerni suleqatimik assiganik periarfissaqarsinnaaqqullugit.

Siunissami taamatut pisoqartarsinnaanera sillimaffigisariaqarparput. Statsministerit ataatsimiinneranni peqqinnissaqarfimmut tunngatillugu assersuut alla saqqummiuppara, tassalu nakorsaatinik nalunaaqqutsersuisarnermut tunngatillugu maleruagassat allanngortinnissaannut EU-mi suliaq. Tassunga tunngatillugu nunani avannarlerni ataatsimoorluta suliamut tunngatillugu salliulluta inissisimanissarput pingaaruteqartorujussuuvoq, Kalaallit Nunaanni pisariaqartitavut aallaavigalugit aaqqiissutissanik nutaanik siunnersuuteqartarsinnaajumalluta”  Sara Olsvig taama oqarpoq.

Annertusisamik paasissutissanik pissarsinissami attavigiuk Naalakkersuisup allattaa Nina Jul Larsen e-mail nina@nanoq.gl imaluunniit oqarasuaat 53 93 71.