Kulturikkut suleqatigiinnissamut isumaqatigiissut

Nunat Avannarliit Killit Ilinniartitaanermut, Ilisimatusarnermut Kultureqarnermullu Naalakkersuisuisa, Rigmor Dam, Savalimmiut, Doris J. Jensen, Kalaallit Nunaat, aamma Kristján Þór Júlíusson, Island, ullumi Helsinkimi atsioqatigiissutigaat nunat taakkua akornanni kulturikkut suleqatigiinnissamut isumaqatigiissut.

Isumaqatigiissummi siunertaavoq nunat taakkua akornanni kulturikkut suleqatigiinnerup annertusarneqarlunilu nukittorsarneqarnissaa, siunertaralugu suleqatigiinnikkut pilersitsisarnerup ineriartortitsinerup suliallu pitsaassusissaasa nunani taakkunani najugaqartunut tamanut iluaqutaasumik ineriartortinneqarnissaat. Tamanna anguniarneqassaaq ataatsimoorussamik aningaasalersueqatigiinnikkut, paasissutissiisarnikkut aamma ataqatigiissaarinikkut kulturimut tunngasutigut suliniuteqarnikkut. Suleqatigiinneq nukittorsarniarneqassaaq annertunerulersinniarneqarlunilu paasissutissiisarnermi teknologiimik iluaquteqarnikkut. Isumaqatigiissummi kulturi taaguutitut siammasissutut paasineqarpoq.

Isumaqatigiissummi namminermi suliniuteqarfissaq ataasiinnaq eqqaaneqarpoq, tassalu „Nunat avannarliit killiit Ulluat“, Nunat Avannarliit Killiit Siunnersuisoqatigiivisa 2008-imi inassuteqaataannit aallaaveqartoq. Tassani pineqarpoq ulloq ataaseq, ukiut tamaasa nunani pingasuni tamani nalliussineqartartoq. Ukialeqqaarnera, (septembarimi) qinerneqarsimavoq nunat avannarliit killiit oqaluttuassartaat aamma kulturiat malunnartinniarlugu, aammali nunat akornanni ataqatigiinneq suleqatigiinnerlu nukittorsarumallugit. Isumaqatigiissummi suliniuteqarfiusussat sinneri ukiut sisamakkaartumik isumaqatigiissutigineqartassapput, nunallu paarlakaallutik akisussaaffigisassallugit.

Piffissami ukiut siulliit sisamat ingerlaneranni nunat sulissutiginiarpaat suliniutit filminut, qarasaasiami spillernermut, nammineq piumassutsimik sullissinermut aamma oqaatsinut tunngasut.

Doris J. Jensen oqarpoq: ”Isumaqatigiissut nuannaarutigaara, qilanaaralugulu nunat akornanni pitsaasumik suleqatigiinnissarput.”

Sivisuumik ileqquuvoq kulturikkut nunat avannarliit killiit suleqatigiittarnerat. 1996-imi siullermeertumik isumaqatigiissusiortoqarpoq kulturikkut, ilisimatusarnikkut aamma ilinniartitaanikkut suleqatigiinneq pillugu. Isumaqatigiissummi nutaami kulturikkut suleqatigiinneq pingaartinneqarpoq.

Attavissaq: Naalakkersuisup allattaa Rosa Thorsen, rosat@nanoq.gl