Meeqqat Inuusuttullu pillugit nunat avannarliit periusissiaat saqqummiunneqarpoq

Peqqissutsimut Nunat Avannarliit Suleqatigiinnerannullu Naalakkersuisup Meeqqat Inuusuttullu pillugit nunat avannarliit periusissiaat saqqummiuppaa.

Peqqissutsimut Nunat Avannarliit Suleqatigiinnerannullu Naalakkersuisoq ulluni makkunani Nunat Avannarliit Siunnersuisoqatigiivisa Helsinkimi ataatsimiinneranni peqataavoq.

Novembarip aallaqqaataanni ataatsimiinnerup nalaani Nunat Avannarliit Siunnersuisoqatigiivisa siulittaasoqatigiivisa nunani avannarlerni suleqatigiinnermut miniterit, aamma Naalakkersuisoq, ataatsimeeqatigaat. Naalakkersuisup nunani avannarlerni suleqatigiinnermut ministerii sinnerlugit Nunani Avannarlerni Ministerit Siunnersuisoqatigiivisa Meeqqat Inuusuttullu pillugit periusissiaat nutaaq ”Meeqqat Inuusuttullu Nunani Avannarlerni – Nunani Avannarlerni Ministerit Siunnersuisoqatigiivisa susassaqarfiit akimorlugit periusissiaat 2016 – 2022” saqqummiutissammagu ataatsimiinneq Kalaallit Nunaannut immikkuullarissuuvoq.

Nunani Avannarlerni Ministerit Siunnersuisoqatigiivisa anguniagaat tassaavoq Nunat Avannarliit tassaassasut nunarsuarmi meeqqanut inuusuttunullu sumiiffiit pitsaanerpaat, periusissiamilu anguniagaq taanna anguneqarniassammat aalajangersimasunik malittarisassaqarpoq.

Periusissiaq pillugu Naalakkersuisoq oqarpoq: ”Nalunaarusiap suleqatigiinnermut ministerit tungaanniit Nunani Avannarlerni Siunnersuisoqatigiinnut saqqummiussatta saqqummiunnissaa suliassarilerpara. Suleqatigiinnermut ministeritut periusissiaq piviusunngortissagutsigu ministerit siunnersuisoqatigiivisa allat suliassamik ingerlatsinissaat pisariaqartilluinnarparput, nuannaarutigalugulu oqarsinnaavunga meeqqat inuusuttullu pillugit periusissiamut tunngatillugu taamatorpiaq pisoqarsimasoq. ” issuaaneq naavoq.

Paasisaqarnerujumallutit attavigiuk Naalakkersuisup allattaa Nauja Møller, e-mail: nmor@nanoq.gl, Oqarasuaat: +299 582654 / +45 31405792 imaluunniit AC Fuldmægtig Monika Paulli Andersen e-mail: mopa@nanoq.gl, oqarasuaat: +299 553320 / +45 51640373