Meeqqat inuusuttullu, inuit innarluutillit naligiissitaanerlu Nunat Avannarliit Siunnersuisoqatigiiffiata ataatsimiinnerani ullumi sammineqarput

Nordiske flag

Nunat Avannarliit Siunnersueqatigiiffiata 69-issaanik ataatsimiinnerani ulluni makkunani Helsinkimi ingerlanneqartumi nunat avannarliit meeqqanut inuusuttunullu, inunnut innarluutilinnut naligiissitaanermullu suleqatigiinnerannut atatillugu nassuiaat periusissanik, iliuusissanik, pilersaarutinik pisussanillu imalik saqqummiunneqarlunilu oqallisigineqarpoq.

Sara Olsvig, Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisuunini aallaavigalugu oqallinnermi eqeersimaarluni peqataavoq.

“Suliassanut pingaarutilinnut tassalu meeqqanut inuusuttunullu, inunnut innarluutilinnut naligiissitaanermullu tunngatillugu nunat avannarliit annertuumik suleqatigiipput. Taamaasiornikkut isumalluutitta pingaarnersaat – gultitut nalilik - tassalu inuk Nunani Avannarlerni isumalluutit pingaarnersaanera suaarutigineqarlunilu erseqqissarneqarpoq. Nunat avannarliit suleqatigiinneranni kalaallit assigiinngitsutigut annertuumillu pissarsiffigisartakkatsinnik akuusarpugut” taamak oqarpoq Sara Olsvig, Isumaginninnermut, Ilaqutariinnermut, Naligiissitaanermut Inatsisinik Atuutsitsinermullu Naalakkersuisoq.

Inuit innarluutillit illersuisuanut allaffeqarfimmik, inuit innarluutillit illersuisuanik toqqaanikkut, Sisimiunilu inunnut innarluutilinnut sullissivimmik pilersitsinikkut inuit innarluutillit tapersersorneqarnissaat pillugu inatsisartut inatsisissaatut siunnersuummik Inatsisartut 2017-imi ukiakkut ataatsimiinneranni saqqummiinikkut Kalaallit Nunaanni ilaatigut inunnut innarluutilinnut tunngatillugu suliniutit annertusarneqarneri pillugit Sara Olsvig naatsumik saqqummiinissaminut periarfissaqarportaaq.

Nunat avannarliit suleqatigiinneranni nunani ataasiakkaanni nammineerluta suliagut nunanilu avannarlerni suleqatigiissutigisagut eqaatsumik ataqatigiissumillu ingerlanneqartariaqarput. Tassani pineqarpoq misilittakkatta pitsaasut nunanik avannarlermioqatitsinnik kivitseqatigiiffigalugillu avitseqatigiiffiusarnissaat. Taamaasiornikkut nunat avannarliit suleqatigiinnerat nukittorsassavarput,” Sara Olsvig oqarpoq.

Nunani avannarliit suleqatigiinnerani Issittoq nunat inoqqaavisalu pisinnaatitaaffii ukkatarinerusariaqarput

Nassuiaatit oqallisigineqarneranni Issittup nunat inoqqaavisalu pisinnaatitaaffiisa nunani avannarlerni suleqatigiinnermi annertunersumik ukkatarineqarnissaat Sara Olsvigip kaammattuutigaa.     

Issittumi inuusugut immikkut unammilligassaqarlutalu periarfissaqartitaavugut. Tamanna ilaatigut meeqqanut inuusuttunullu, inunnut innarluutilinnut naligiissitaanermullu tunngatillugu nunat avannarliit suleqatigiinneranni ersersinneqartariaqarpoq. Nunat Avannarliit suleqatigiinneranni Kalaallit Nunaannilu pissutsit killiffiat nalilersinnaajumallugu oqimaaqatigiissumik ineriartortitsinissamut FN-ip nunarsuaq tamakkerlugu piujuaannartitsineq tunngavigalugu ineriartortitsinissamut anguniagaata sakkutut atornissaa orniginartitaraara, tamannalu oqallinnerup nalaanni arlaleriarlunga oqaatigaaara” Sara Olsvig naggasiilluni oqarpoq.     

Isumaginnermut , Ilaqutariinnermut, Naligiissitaanermut Inatsisinik Atuutsitsinermullu Naalakkersuisoq Naalakkersuisut Siulittaasuannut tullersortitut siullertut kiisalu Isumaginnermut, Ilaqutarinnermut, Naligiissitaanermut Inatsisinillu Atuutsitsinermut Naalakkersuisutut peqataavoq.

Annertunerusumik paasisaqarusukkuit naalakkersuisup allattaa, Nina Jul Larsen, e-mail-ikkut nina@nanoq.gl imaluunniit tlf. 53 9371 aqqutigalugu attavigineqarsinnaavoq.