Nunat Avannarliit Siunnersuisoqatigiiffiata ataatsimiinneranni Kalaallit Nunaat peqataavoq

Nunat Avannarliit Siunnersuisoqatigiiffiata ataatsimiinnera ullumi 31. oktober ammarlugu nunat siuttuisa oqallinneranni Kalaallit Nunaat sinnerlugu Naalakkersuisut Siulitaasuannut tullersorti siulleq Sara Olsvig peqataavoq.

Nunat Avannarliit Siunnersuisoqatigiiffiata ataatsimiinnerani Naalakkersuisut siulittaasuannut tullersorti siulleq Sara Olsvig, Peqqissutsimut, Nunanullu Avannarlernut Naalakkersuisoq Agathe Fontain kiisalu Kultureqarnermut, Ilinniartitaanermut, Ilisimatusarnermut Ilageeqqarnermullu Naalakkersuisoq Doris Jakobsen Naalakkersuisut sinnerlugit peqataapput.

Nunat Avannarliit Siunnersuisoqatigiiffiata nunat avannarliit nunarsuarmi nunat akuulersitsinerpaatut inissisimasup qanoq iliorluni nukittorsarsinnaanissaanut tunngatillugu oqallinnissamut nunani avannarlerni naalakkersuisut siulittaasui oqallinnissamut aggersarneqarsimapput. Nunat Avannarliit suleqatigiinnerat innuttaasut nunallu akunnerminni tatigeqatigiinnerat oqaluttuarisaanikkut ineriartortinneqarsimasoq aallaavigalugu ingerlanneqarpoq.

"Nunat avannarliit suleqatigiinneranni Naalakkersuisut Kalaallit Nunaatalu peqataanerat pingaaruteqarpoq. Nunani avannarlerni ataatsimut naleqartitarpassuit aallaavigalugit qanimut suleqatigiinneq tassani misigisarparput. Akuulersitsineq eqqartorneqartillugu nunani avannarlerni nunatut immitsinnut akisussaaffigeqatigiinnerput aammalu nunatut ataasiakkaattut nammineq akisussaaffigalugu akuulersitsiniarneq pineqarput", taamak oqarpoq Nalaakkersuisut siulittaasuata tullia Sara Olsvig.

Nunani ataasiakkaani inuit ikinnerussuteqartut pisinnaatitaaffiisa qulakkeerneqarnissaannut piumasaqaataasut Sara Olsvigip oqalugiarnermini eqqartorpai. Kalaallit Nunaanni inuit pisinnaatitaaffiinut tunngatillugu pisussaaffiit naammassiniarlugit sulineq aammalu suliassat ataatsimoorluni aaqqitassat Olsvigip oqalugiarnermini erseqqissaateqarfigai. Nunani avannarlerni innuttaasut akornanni tunngaviusumik tatigeqatigiinneq aallaavigalugu sulisoqartillugu suleqatigiinnerup akuulersitsiniarnermullu suliat annertuumik pitsanngorsarneqarsinnaaneri taamaasilluni erseqqissaateqarfigai.

Taamatut sulineq naalakkersuinikkut pisariaqartumik aqunneqartariaqarpoq, taamaasiornikkummi akuulersitsiniarneq nunani ataasiakkaanni inuiaqatigiit ineriartornerini ajornartorsiutinik pilersitsisinnaanera pinngitsoorneqarsinnaammat.

Nunat Avannarliit Siunnersuisoqatigiiffiata sulineranut innuttaasut tamarmik akuutsinneqarnissaasa qulakkeerneqarnissaanut tunngatillugu Nunat Avannarliit unammilligassaat Olsvigip tikippai. Tassunga tunngatillugu inuiaat saamit Nunat Avannarliit Siunnersuisoqatigiiffiani peqataatinneqannginneri erseqqissaateqarfigaa, tamannalu Nunat Avannarliit akuutitsinerusumik ingerlatsilernissamik kissaateqarneranut atatillugu Nunat Avannarliit Siunnersuisoqatigiffianut unammilligassaqartitsisuusoq.

Tusagassiuutinut nalunaarummut ilanngullugu nassiunneqarpoq Nunat Avannarliit Siunnersuisoqatigiffiata ullumi oqallinneranni saqqummiussaq.