GME-p imaani isumannaallisaaneq pillugu nalunaarusiaa tusarniutigineqarsinnaa-voq

GME-p imaani isumannaallisaaneq pillugu nalunaarusiaa (NIS-imik nalunaarusiaq) tamanut tusarniutigineqarsinnaavoq

Greenland Minerals and Energy Ltd. (GME) Ulloq 11. Oktober 2017-mi imaani isumannaallisaaneq pillugu nalunaarusiap (NIS-imik nalunaarusiap) killiffia pillugu tusagassiuutinut nalunaarummik saqqummiussivoq.  NIS-imik nalunaarusiaq taakku Kuannersuarni qalluisinnaanermut qinnuteqaataanni atugassatut suliaavoq. Tusagassiuutit arlallit tusagassiuutinut nalunaarummi tassani paasissutissanik toqqammaveqartumik nutaarsiassanik saqqummiussipput. 

Taakkunani arlallit NIS-imik nalunaarusiaq maanna Søfartsstyrelsip Namminersorlutik Oqartussat sinnerlugit akuersisimanera allaaseraat.

NIS-imik nalunaarusiap Søfartsstyrelsimit nalilerneqarsimanera eqqorpoq. NIS-imik nalunaarusiap maanna tamanut tusarniaasoqarsinnaasutut pitsaassuseqalernera Søfartsstyrelsip Namminersorlutik Oqartussanut nalunaarutigaa. Tamannalu tunuliaqutaralugu NIS-imik nalunaarusiap maanna tamanut tusarniaassutigisinnaasutut pitsaassuseqalernera Namminersorlutik Oqartussat GME-mut nalunaarutigaa. Taamaammat nalunaarusiaq akuerineqanngilaq. Taanna tusarniaassutigisinnaasutut pitsaassuseqartutut nalilerneqarsimavoq.

Uunga saaffiginnilluni paasissutissat annertunerusut pissarsiarineqarsinnaapput:

Jørgen T. Hammeken-Holm, Naalakkersuisoqarfiup pisortaa - Aatsitassanut Ikummatissanullu Naalakkersuisoqarfik, tlf: 346846, e-mail: joeh@nanoq.gl