Rubinit Canadamit angalanerat isorartooq naammassivoq

Canadamit Vancouverimit Kalaallit Nunaannit 4381 km-erisut isorartutigisumik angalaneq maanna naammassivoq. Rubinit Aappaluttumi aatsitassarsiorfimmeersut, ukiuni arlalinni Canadamiittut maanna Kalaallit Nunaannut assartorneqarsimalerput.

Greenland Ruby A/S-p Vancouverimi containerit rubininik qaarsortanillu ulikkaarlugit immerpai. Kingornalu taakku nunatsinnut qalluiffiusumut uternermi aqqut ungasissoq atorlugu oqqunneqarput.

Aatsitassanut Ikummatissanullu Naalakkersuisup aatsitassat nunatsinni qallorneqartut nunatsinni innuttaasunut tamanut iluaqutissanngornissaat pingaartutut isigigamiuk suliaq qanimut malinnaaffigaa. Aatsitassanut Ikummatissanullu Naalakkersuisoq ima oqaaseqarpoq:

Aatsitassat tamatta ataatsimoorluta pigaavut. Taamaammat aatsitassat maani nunatsinni qallorneqartut inuiaqatigiinnut iluaqutaassapput.

Qaarsortat Rubinit oqqunneqartut kingulliit aallaqqaammut Nuummi umiarsualiviliaanneqarput. Aatsitassanut Ikummatissanullu Naalakkersuisup rubinit nunatsinnut oqqunneqarnerisa qularutigineqanngilluinnarnissaat kissaatigaa. Taamaammallu Aatsitassanut Ikummatissannullu Naalakkersuisoqarfimmi ujarassiornermut immikkoortortaqarfiup Nuummi umiarsualiviliarlutik containarit rubininik imaqartut takusarpaat. Taamaalillutik Aatsitassanut ikummatissanullu Naalakkersuisoqarfimmi ujarassiuunit containerit rubininik imaqartut misissoreerlutik.

Siullermeertumilli qaarsortat ujaqqanik pinnersaasiassanik akoqartut misissorneqanngillat. Rubinit 2011-2015-mi Canadamiinneranni siunnersortit avataaneersut Aatsitassanut Ikummatissanullu Naalakkersuisoqarfik sinnerlugu nakkutilliinernik qulinik ingerlatsipput. Aatsitassanut Ikummatissanullu Naalakkersuisoqarfimmi atorfilittaq ataasiarluni Atlantikorsuaq ikaarlugu rubininik nakkutilliiaartorpoq. Taamaalilluni rubinit Canadamut tikinneranit nunatsinnut oqqunneqarnissaa tikillugu Aatsitassanut Ikummatissanullu Naalakkersuisoqarfimmit nakkutigeqqissaarneqarpoq.

Rubinit Nuummit Qeqertarsuatsiaat eqqaanniittumut Aappaluttumut angalanerat kingulleq 131 km-inik isorartussusilik oktoberip 18-ani naammassineqarpoq. Maanna rubiinisiorfimmik piginnittut Greenland Ruby A/S-ip TNG-p piaanissamut akuersissutaanik tigusinemigut aammalu Aatsitassanut Ikummatissanullu Naalakkersusoqarfiup piumasaqarneratigut maanna rubiinit nunatsinnut angerlaassimalerpai. Rubiinit angerlaanneqartut maanna rubiininut piiarneqartunut ilaatillugit tunisassiornermut tuniniaanermullu pilersaarummut ilanngunneqassapput.

Rubinit ujaqqanik pinnersaasiassanik akoqartut maanna assartornerata naammassineqarnera Aatsitassanut Ikummatissanullu Naalakkersuisup iluarisimaarpaa. Aatsitassanut Ikummatissanullu Naalakkersuisoq ima oqaaseqarpoq:

Greenland Ruby A/S-p rubininik maanna nunatsinnut oqqussereernerani kiisami suliaq naammassivarput. Suliaq sivisuumik ingerlanneqarpoq, maannalu qujanartumik naammassilluarneqarpoq. Mannalu qaarsortap nunatsinni piiarneqartup sapinngisamik annertunerpaamik nunatsinni innuttaasunit tamanit iluaqutigineqarsinnaalernera iluarisimaarpara.

Aatsitassanut Ikummatissanullu Naalakkersuisoqarfik suliaq pillugu siusinnerusukkut tusagassiutinut nalunaarusiorpoq http://naalakkersuisut.gl/kl-GL/Naalakkersuisut/Pisut/2017/08/160817_rubiner

Ukununnga saaffiginnilluni paasissutissat annertunerusut pissarsiarineqarsinnaapput:

Jane Petersen Lantz,  Naalakkersuisup allattaa – Aatsitassanut Ikummatissanullu Naalakkersuisoqarfik, tlf: 346839, e-mail: japl@nanoq.gl

Jørgen T. Hammeken-Holm, Naalakkersuisoqarfiup pisortaa – Aatsitassanut Ikummatissanullu Naalakkersuisoqarfik, tlf: 346846, e-mail: joeh@nanoq.gl