Innuttaasunut aamma inuussutissarsiorfinnut iluaqutaasussatut iluarsiissutit atajuartussat

Innuttaasut inuunerminni atugarisaanni annertunerusumik naligiinnerulernissa-mik inuussutissarsiornermilu pitsaasunik atugaqarnissaq pillugu suliaqarnissaq naalakkersuisooqatigiinnissamik isumaqatigiissummi Inuussutissarsiornermut, Suliffeqarnermut, Niuernermut Nukissiuuteqarnermullu suliassaqarfianiittoq pingaartut ilagaat.

Taamaattumik nammaqatigiinnermik naapertuilluarnermillu tunngaveqartumik innaallagissamut aamma imermut akigititat ilusaannik tamakkiisumik iluarsaaqqinneq Inuussutissarsiornermut, Suliffeqarnermut, Niuernermut Nukissiuuteqarnermullu Naalakkersuisup saqqummiuppai – taamaalilluni akit nutaat illoqarfinni innuttaasunut ullumikkut appasissunik akiliisareersut pilliutigalugit akit nutaat eqqunneqaratik.

Anguniakkat taakku innaallagissamut imermullu assigiimmik akeqartitsinermik eqqusseqqinnikkut anguneqarluarnerusinnaasut Naalakkersuisut isumaqarput.

Ullumikkut najugaqarfiit amerlanerpaat innaallagissamut kWh-ikkaanut 3,25 kr. akiliutigisarpaat (Nuummi kWh-ikkaanut 1,63 kr., Ilulissani kWh-ikkaanut 2,50 kr.) – iluarsaaqqinnermi nutaami assigiimmik akeqartitsilernermi kikkunnut tamanut aki tassaalissaaq kWh-ikkaanut 1,60 kr.

Erngup akia eqqarsaatigalugu ullumikkut amerlanerpaat m3-ikkaanut 33,40 kr.-nik akiliisarput (Nuummi m3-ikkaanut 25,55 kr. – Ilulissani m3-ikkaanut 19,12 kr.) – iluarsaaqqinnermi nutaami assigiimmik akeqartitsilernermi kikkunnut tamanut aki tassaalissaaq m3-ikkaanut 19 kr.

Pingaarnerpaatut anguniagaq tassaasimavoq kikkunnut tamanut atugassarititat oqilisaaviginissaat, illoqarfeeqqanili minnerni nunaqarfinnilu innuttaasunut sipaarutit annerpaat tussapput.

Aamma innaallagissamut imermullu suli appasinnerusunik akigititanik akinut iluarsaaqqinnermik nutaamik aalisakkanik suliffissuit iluaquserneqassapput.

Inuiaqatigiinnut tamanut tamakkiisumik sipaarutaasoq 150 mio. kr.-t missaanniippoq.

”Inoqutigiit ataasiakkaat aningaasaqarnerannut toqqaannartumik sunniuteqartumik iluarsaaqqinnermik saqqummiussisinnaanissaq uannut pingaartuusimavoq,” Naalakkersuisoq Hans Enoksen oqarpoq, nangipporlu, ”najugaqarfinni minnerni inoqatitta ilarpassui ulluinnarni aningaasaqarniarnermikkut annertuunik unammillerfissaqarnerat tamatsinnut paasinarpoq. Akigititanik iluarsaaqqinneq manna aqqutigalugu kikkut tamarmik iluaqutigisassaannik nammaqatigiissumik iluarsiissuteqarneq Naalakkersuisut iluatsissimavaat.”

Iluarsaaqqinneq tassaavoq AIS2018-ip aappassaaneernissaanut Naalakkersuisut saqqummiussassaattut allannguutissatut siunnersuutip ilaa.

Erseqqinnerusunik paasissutissat pillugit naalakkersuisoqarfimmi pisortaaneq Jørn Skov Nielsen mobil 556188-ikkut attaveqarfigiuk.

Saqqummiinermi najoqqutarineqartut (PDF) nuisikkit

Tusagassiortunik katersortitsinermi nipi immiussaq tusarnaaruk

Assit tusagassiortunik katersortitsinermi assilisat