Royal Arctic Line-p tatigineqarnini uterteqqittariaqarpaa

Skibsfart og klima

Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisup Erik Jensenip Royal Arctic Linep pisortaanera Verner Hammeken ataatsimeeqatigaa, nassiussalerinermi unammilligassaat aaqqiiniarlutillu suliniutaat pillugit tusarfiginiarlugu.

Naalakkersuisoq Erik Jensen oqarpoq:

- Isornartorsiuinerit tusarnaarpakka, taamaattumillu Royal Arctic Line ataatsimeeqatigerusussimavara, sullitallu akunnerminni tatigeqatigiinnermik utertitsiniarlutik pilersaarutaat tusarniarlugit.

- Royal Arctic Linep sullitaasa ilaat ingerlatseqatigiiffiup aaqqissuussinermik allanngortiterineranit eqqugaasimammata ajuusaarnarluinnarpoq. Royal Arctic Linep ajutoornernik arlalinnik eqqorneqarsimanerata pissutsit ajornaannerulersinngilaat. Kisiannili siumut isiginissaq unammilligassanillu aaqqiiniarluni sulinissaq pingaaruteqarluinnarpoq.

- Kiisalu iisimatitsissutigisinnaavara, Royal Arctic Linep tungaaniit piaarnerpaamik suliniutinik, pitsannguinissamik siunertaqarfiusunik aallartitsisisoqarnissaa tatigigakku. Uanga Naalakkersuisoqarfimmalu pissutsit ineriartornerat malinnaaffigilluarpavut, aammalu piffissap sivisitsup ingerlanerani malunnaatilinnik pitsannguisoqarnissaa naatsorsuutigaarput.
Naalakkerusisoq erseqqissaavoq, ingerlatseqatigiiffik inuiaqatigiinnut pingaarutilerujussuarmik inissisimasoq, aammalu Kalaallit Nunaanni sumiiffinnut 65-it sinnerlugit amerlassusilinnut pilersuisussaatitaaneq suliassaralugu.

Royal Arctic Linemiit ilisimatitsissutigineqarpoq, ingerlatseqatigiiffik nutarterinermut atatillugu IT-kkut sullississutinik nutaanik pingasunik atuutsitsilersimasoq. Teknikkikkut unammilligassat kingunerisaannik Royal Arctic Line sullissinermi pissutsit, silap sikullu nassataannik umiarsuit angalanissanut pilersaarutaannik allannguisoqartillugu malinnaaniapiluulersimavoq. Unammilligassat taakku umiarsuit sullissineranni pisunit (maskiinanik ajutoornerit, ilussamut aporneq, ikkarlinneq kinguaattoornerillu) sakkortunerulersinneqarsimapput, taakkulu aamma peqqutaallutik atortut nutaat annertoorsuarmik suleruluffiulersimallutik. Tamanna juulimi annertunerpaavoq. Aamma taakku saniatigut Nuummi umiarsualiviup atulernissaanut piareersaanerit ilanngunneqarput.

- KNI-p tusagassiorfitsigut saqqummiussereernerata kingorna ilisimatinneqarpunga, Royal Arctic Linep KNI 31. oktober 2017 ukiuunerani pilersuinerit inissinnissaasa qulakkeerneqarnissaa pillugu ataatsimeeqatiginiarlugu qaaqqusimavaa, suleqatigiinnissaammi pisariaqarluinnarmat – inuiaqatiigiit pillugit – taamaattumik isumalluarpunga, Erik Jensen oqarpoq.