Kitaata avataani qaleralinnik aqutsinissamut pilersaaruteqalerpoq

Kitaata avataani qaleralinnik aqutsinissamut pilersaarutigineqalersoq Naalakkersuisunit akuerineqaqqammerpoq.

NAFO-p Ilisimatuussutsikkut Siunnersuisoqatigiivinit, NAFO Scientific Council, aamma Pinngortitaleriffimmit uumasoqassuseq pillugu siunnersuinerit tunngavigalugit aamma suliamik ingerlatsisut attuumassuteqartut oqaloqatiginerisigut aqutsinissamut pilersaarut Aalisarnermut Piniarnermullu Naalakkersuisoqarfimmit suliarineqarpoq.

Kitaani avataasiorluni qaleralinniarnermut MCS-imut akuersissummut allagartaq anguniarlugu ilungersuuteqarnermut tunngatillugu matumunnga aqutsinissamut pilersaarut suliarineqassasoq aalisarnermik inuussutissarsiuteqartunit assut kissaatigineqarsimavoq.

Pisisartunit amerlanerujartuinnartunit nioqqutissiat MCS-imik akuersissummik allagartallit ukiuni kingulliunerusuni piumaneqaleriartorsimapput, taamaalillunilu niuerfimmi tunisat annertussusaat taamaaginnassappata akuersissummik allagartaliineq pisariaqalivissimavoq. Tamatuma saniatigut piumaneqarnerulernerinut nioqqutissiat akuersissummik allagartallit akisunerugajuttarnerannik akissutissaqartinneqarpoq.

Ikersuaq Davisip Avannaatalu Imaani qaleralinnik atuinerup nungusaataannginnissaa pillugu NAFO Scientific Councilimit siunnersuisoqarnissaa aqutsinissamut pilersaarummi naatsorsuutigineqarpoq. TAC-imut (pisassiissutit ataatsimut katillugit) tamakkiisumut NAFO-p Ilisimatuussutsikkut Siunnersuisoqatigiivisa (NAFO Scientific Council) siunnersuinerat tunngavigineqarpat, aalisagaqassuseq imatut iliorluni iluarsiissuteqarfigineqassaaq, aalisarnerup annertussusia peqassutsip uumasoqassutsimi nikerarneranut aamma qalerallip atorneqarneranut ilisimasanut pigineqartunut naleqqiussinikkut naleqqussarneqassaaq.


Aqutsinermut pilersaarummi anguniarneqartoq tassaavoq:
- avataani qaleraleqassutsimik atuinermi piujuartitsinermik tunngaveqarnissamut sinaakkusersuinerit,
- MSC-mut akuersissummik allagartalersuinerup taassumalu aningaasaqarnikkut pitsaaqutai qulakkiissallugit aalajangiusimassallugillu, kiisalu
- uumassusilerisunit siunnersuinerni allanngorarnerit aamma aaqqiissuteqarnernut ataatsimut aaqqissuussinerit atuutilersinneqarneranni uumassusilerisunit siunnersuinerup aalajaatsuunissaanut sukkasuumillu naleqqussarsinnaanermut inuussutissarsiuteqartut kissaatigisaattut ataqatigiissilernissaat

Aqutsinissamut pilersaarut uani atuarsinnaavat

Attavigineqarsinnaavoq Aalisarnermut Piniarnermullu Naalakkersuisoqarfimmi immikkoortortami pisortaq, Kunuk Holm. Email: kunh@nanoq.gl