Nunarput ikerinnarsiortut pillugit pingaarutilimmik isumaqatiginninniarpoq

Avaleraasartuut ammassassuillu pillugit naalagaaffiit sineriallit Londonimi sapaatip akunnerini kingullerni isumaqatiginninniarput.

Aalisakkat pineqartut Atlantikup avannaa tamaat siaruarfigeqqavaat, taamaammat aalisakkat nunat allat suleqateqatigalugit allaffissornikkut aqunneqartarput.

Nunarput avaleraasartuunut naalagaaffittut sinerialittut siornali akuerisaammat, nunatta nunat allat avaleraasartuut ataatsimut aqunneqarnissaat pillugit suliniaqatigisarsimavai.

Naalagaaffittut sinerialittut nunat pingasuinnaat maannakkut isumaqatigiissuteqarputt, tassaasut EU, Norge, aamma Savalimmiut, nunarput Islandinilu ilaanatik.  

Avaleraasartuut pillugit isumaqatiginninniartoqarmat nunarput naalagaaffittut sinerialittut isumaqatiginninniarnissaminut piareersimavoq, Norgeli, EU aamma Savalimmiut ukiunut tulliuttunut marlunnut isumaqatigiissutiminnut ammaassiumanngillat.

Nunarput ukiuni kingullermi marlunni nalunaaruteqartuarpoq, naalagaaffittut sinerialittut nunaagatta ammassassuit pillugit aamma isumaqatigiissusiortunut ilaasinnaalluni.

Tamanna tunngavigalugu Tunumi ukiuni arlaqaqisuni ammassassuarniartarpugut.

Nuna nunatut sinerialittut isigisaasoq naalagaaffiit allat sinerialittut isumaqatiginninniarnerinut peqataanissaannut periarfissaqartussaavoq, naalagaaffiit aalisakkat pineqartut qanoq aqunneqarnissaannut aalajangiisoqalersillugu.

Nunarput naalagaaffittut sinerialittut akuersaaqqulluni piumasaqarmat mikinngitsumik tapersersorneqarpoq, Ruslandili maannamut suli tapersersuerusunngilaq.

Naalagaaffiit sineriallit ammassassuarniarsinnaasut tassaapput Island, Savalimmiut, Norge, Rusland aamma EU. Ammassarsuarniarnissamut maannamut suli isumaqatigiississusiortoqanngilaq.

” Atlantikup avannaani aalisakkat ikerinnarsiortut ataatsimullusooq pigisatta isumaqatiginninniutiginerinut nunatta peqataanissaa pingaaruteqartorujussuuvoq.

Nunat aatsaat suleqatigiikkaangata qularnaarinnittoqarsinnaasarpoq aalisakkat ikerinnarsiortut piujuaannartitsinermik tunngaveqarluni aalisarneqarnissaannut.  

Taamaattumik pakatsivunga isumaqatiginninniarneq siuariarnertut oqaatigineqarsinnaanngimmat, nunallu tamarmik paasisimanngimmassuk nunarput ammassassuit pillugit aamma naalagaaffittut sinerialittut pineqartariaqartoq.  Tamanna pillugu siunissami sulissutigissavarput”, Naalakkersuisoq Karl-Kristian Kruse oqarpoq.

Isumaqatiginninniarnermi peqataapput Aalisarnermut Piniarnermullu Naalakkersuisoqarfik Pinngortitaleriffimmilu biologit aamma nunatsinni aalisarnermik inuussutissarsiuteqartut sinniisaat.

Annerusumik paasisaqarusukkuit Aalisarnermut Piniarnermullu Naalakkersuisoqarfimmi  immikkut ilisimasalittut atorfeqartitaq, Katrin Vilhelm Poulsen, attavigineqarsinnaavoq. tlf: 55 33 46, email: kavi@nanoq.gl