Piitsuussuseq akiussavarput naligiinngissuserlu annikillisarlugu

Piitsussutsip nungutinneqarnissaanut Naalagaaffiit Peqatigiit ullorititaannut atatillugu Naalakkersuisoq Sara Olsvig ima oqaaseqarpoq:

Naalagaaffiit Peqatigiit nunarsuaq tamakkerlugu piujuaannartitsineq tunngavigalugu ineriartornissamik anguniagai 17-it aqqutigalugit, nunarsuaq piujuaannartitsiviusoq piitsuussuseqanngitsoq (nunarsuaq tamakkerlugu anguniagaq nr. 1) annikinnerusumillu naligiinngiffiusoq (nunarsuaq tamakkerlugu anguniagaq nr. 10) pilersinniarlugu ilungersuuteqarput. Ullumi ulloq 17. oktober tassaavoq Naalagaaffiit Peqatigiit nunarsuaq tamakkerlugu piitssuussutsip nungutinneqarnissaanut ullorititaa. Naalagaaffiit Peqatigiit oqariartuutaat tassaavoq ataatsimooqatigiilluta piitsuussuseq qanorluunniit iluseqaraluarpat sumiikkaluaruttaluunniillu nungutinniassagipput.

Piitsuussutsip nungutinnissaanik anguniagaq nunarsuarmut tamarmut nunatsinnullu tunngatillugu isiginiarsinnaavarput. Nunatsinnit isiginneriaaseqarlutik Naalakkersuisut anguniagaraat inuiaqatigiinni inuunermi atugarisat pitsanngorsarnissaat naligiinnginnerullu annikillisarnissaa. Naligiinngissutsip annikillisarnissaanut piitsuussutsillu killissaanut aalajangiinissamut tunngavissanik ukkatarinnittumik Naalakkersuisut nalunaarummik suliaqarput.  Nalunaarusiaq ukiakkut ataatsimiinnerup matuma ingerlanerani Inatsisartunut agguaanneqassaaq.

Piitsuussutsimut killiliussaq tassaavoq periuseq aamma uuttortaaneq, inuiaqatigiinni piitsuussutsip annertussusaata erseqqissarnissaanut atorsinnaasoq. Piitsuussutsimut killiliussaq atorneqarsinnaavoq inuit immikkut ernumanartorsiortut paasinissaannut aamma politikkikkut suliniutit anguniagaqarluartumik ingerlannissaannut. Taamaalilluni piitsuussutsip pisortatigoortumik killilerneratigut naligiinngissutsimut piitsuussusermullu unammilligassagut ersarissarneqassapput. Aammattaaq piitsuussutsimut killiliussaq tassaasinnaavoq pisussaaffiliisumik anguniagassaliornissamut aallaavissaq pitsaasoq, taamaalilluta piitsuussutsip annikillisarnissaa sulissutigisinnaaniassagatsigu.

Taamaattoq piitsuussutsimut killiliussaq kisimiissinnaanngilaq. Piitsuussutsip inooqatigiinnikkut ajornartorsiutit imaannaanngitsut nassatarisinnaavai. Pingaartuuvoq piitsuussutsimut suut pissutaanersut kiisalu piitsuussuseq ilaqutariinnut inunnullu ataasiakkaanut qanoq kinguneqartarnersoq isiginiassallugit.  Piitsuussuseq tassaavoq inuiaqatigiinni pissutsit assigiinngitsorpassuit kingunerisaat. Piitsuussuseq sunniuteqarluartumik akiorneqassappat ataatsimoortumik isiginneriaaseqarluni politikkeqarnissaq pisariaqarpoq. Politikki tigussaasunik ataatsikkoortunillu politikkeqarnikkut, ajornartorsiummik saaffiginnittoq, aamma meeqqat inersimasullu inooqatigiinnikkut ernumanartorsioqqajaasut periarfissaannik patajaallisaasoq.

Uannut pingaaruteqarluinnarpoq uagut inuiaqatigiittut akisussaaffimmik tigusinissarput aamma meeqqat piitsuullutik peroriartunnginnissaannik sulissuteqartuarnissarput. Meeqqat piitsuullutik peroriartortarput - amigaateqarlutik. Inuiaqatigiit avataannut inissitaaneq misigisinnaavaat, peqqissutsimut naleqqiullugu ulorianartorsiorlutik atugarisaqarput, aamma persuttaanerit, kinguaassiutitigut atornerlugaanerit imigassamillu atornerluinerit akornannillutik peroriartornissamut ulorianartorsiornerusarput. Qaavatigullu meeqqat piitsuullutik peroriartortut inersimalerunik namminneq piitsunngornissaminnut qaninnerusarput. Taamaalilluni pineqarput inuttut atukkatigut kingornuttakkat ajortut. Tamanna akiorniarlugu ilungersorluta sulisariaqarpugut.

Namminneq periarfissaminnik unammillernissaminnut inuunerminnilu atugarissaarnermik angusaqarnissaminnut kikkut tamarmik periarfissaqartariaqarput.  Tamatumani ataasiakkaat inuunerisa pitsaassusaat periarfissaallu pineqarput, aammalu inuiaqatigiit eqqarsaatigineqarlutik. Innuttaasut periarfissaat tamakkiisumik atorneqanngippata, inuit ilaasa arlaannik peqquteqartumik, assersuutigalugu isumaginninnikkut toqqissisimaneq, pitsaasumik atuartitaaneq suliffeqarnissarlu periarfissaqarfiginngippatigit, inuiaqatigiit tamarmiullutik ajunaarutigissavaat. Naleqartitat sinaakkutissallu ilaqutariinnik inuiaqatigiinnillu tapersiisut siuarsarnissaannut piginnaanissarput, aamma ilaqutariit inuiaqatigiillu meeqqat pisariaqartatigut inooqatigiinnikkut ilinniakkatigullu pisinnaasaqarluarlutik namminneq inuunerminnik aqutsisinnaanngorlutik peroriartornissaannut suleqatigiinnissarput pingaarluinnarpoq naligiinngissuseq piitsuussuserlu unitsissagutsigit. Tamanna tassaavoq piitsuussutsip pinaveersaartinnissaanut aqqutissaq pitsaanerpaaq.”

Annertusisamik paasissutissanik pissarsinissami attavigiuk Naalakkersuisup allattaa Nina Jul Larsen e-mail nina@nanoq.gl imaluunniit oqarasuaat 53 93 71.