Inatsisartuni ilaasortamut, Michael Rosingimut, akissutigineqartoq tupannartoqanngilaq

- AG pingasunngormat, oktobarip 11-anni saqqummerami qulequtaraa: “Isertuussineq tupannartoq”.  Tamanna Naalakkersuisut aalisarnermut inatsisissatut siunnersuut naammassisimasoq Inatsisartunut saqqummiutilerpassuk tupannaranilu demokratiimut innarleeqqajarnavianngivippoq, Aalisarnermut Piniarnermullu Naalakkersuisoqarfimmi pisortaaneq oqarpoq.

AG Transparency Greenlandip siulittaasua Anita Hofferip oqaasii issuarlugu allappoq, oqarnerarlugu Naalakkersuisup Inatsisartunut ilaasortamut Michael Rosingimut akissutaa isertuussinerummat tupannaqisoq.

- Anita Hofferip taama oqarnerata takutiinnarpaa inatsisissamik piareersaanermut paasinnissimananilu sianigisaqanngitsoq, Jørgen Isak Olsen erseqqissaavoq.

Naatsorsuutigineqarpoq aalisarnermut inatsisissatut siunnersuut naammassereersimasoq Inatsisartunut novembarip 8-anni tunniunneqassasoq.

Inatsisissatut siunnersuut Inatsisartut novembarip 16-ianni siullermeerlugu oqaluuserissavaat.

- Naalakkersuisut kissaatigivaat siunnersuummik naammassineqarsimasumik suliarilluagaasimasumillu tunniussissallutik, Inatsisartut paasissutissanik pisariaqartunik tunngaveqarlutik oqaluuserisaqarsinnaassammata.

Siunnersuut Inatsisartunut suli tunniunneqarsimanngimmat kinaluunniit siunnersuummut allannguutissamik allagaqarsinnaavoq, pisortaaneq nassuiaavoq.

Jørgen Isak Olsen erseqqissaavoq Naalakkersuisut kissaatigigaat siunnersuutip suliarineqarnerata tunuliaqutaanik, allagaatinik takunnissinnaatitaaneq tunngavigalugu, tunniussiniaratik. Tamanna nalinginnaalluinnarpoq, inatsisartut pisortat ingerlatsinerat pillugu paasitinneqarsinnaatitaaneq pillugu Inatsisartut inatsisaanni allassimalluni.

Aalisarnermut inatsisissatut siunnersuut sukumiisumik Naalakkersuisut inatsisilerisarfianni Inatsisartullu inatsisilersarfianni aamma misissorneqarpoq. Inatsisissatut siunnersuutit tamarmik taakkunani sukumiisumik misissorneqaqqaartarput.

Inatsisissamik sukumiisumik misissuinerup qulakkeertarpaa inatsisissatut siunnersuutigineqartoq inatsisitut piumasaqaatigineqartut naammassisimanissaat aamma  aningaasatigut kinguneriumaagassai ilaatigut aamma qulakkeerniarneqartarlutik.

Inatsisissatut siunnersuut aggustip 14-iannit septembarip 22-annut, sapaatip akunnerini arfinilinni tusarniutigineqarpoq. Tusarniuteqarnermi akissutigineqartut tamarmik Naalakkersuisut nittartagaanni, tusarniaanermut nittartagaliunneqarsimasumi, atuarneqarsinnaapput.

Tusarniaanermi akissutigineqartut KNR-imut aamma Sermitsiamut nassiunneqarsimapput. Sermitsialli tusarniutigineqartumi akissutigineqartut ilamininngui allaaserisimavai, allat, soorlu KNAPK-mit akissutigineqartoq ilanngussimanagu, naak kattuffik aalisartorpassuarnik ilaasortaaffigineqaraluartoq.

- Naggataatigut paatsuisumik saqqummiussineq pisariaqavissortumik erseqqissaavigineqartariaqarpoq, oqaatigineqarmat siunnersuut akuerineqariaqarpat raajarniarnissamut piffissaligaanngitsumik akuersissutit atorunnaarsinneqassasut.

- Tamanna ilumuunngilaq. Aalisarnermut inatsisissatut siunnersuut akuerineqarpat raajarniarnissamut piffissaligaanngitsumik akuersissutit atorunnaarsinneqassanngillat, Jørgen Isak Olsen erseqqissaavoq.

Attavigineqarsinnaavoq: Aalisarnermut Piniarnermullu Naalakkersuisoqarfimmi pisortaaneq, Jørgen Isak Olsen. Email: jio@nanoq.gl