Inuttaasut pillugit aalajangiisarnerit sukkanerunissaat qulakkeerneqassaaq

Isumaginninnermi Naammagittaalliuuteqartarfimmi suleriaatsit allanngortinneqarnissaanik Naalakkersuisut siunnersuutaat Naalakkersuisut ataasinngornermi 2. oktober Inatsisartunut saqqummiuppaat. Siunnersuuteqarnermut tunngaviuvoq Naalakkersuisut kissaatigimmassuk innuttaasut sullinneqarneranni suliat Isumaginninnermi Naammagittaalliuteqartarfimmut suliakkiutigineqartut sukkanersumik aalajangiiffigineqartalernissaat.

Isumaginninnermi Naammagittaalliuuteqartarfimmut suliakkiutigineqartut nukinginnartut ullumikkut 795-it aalajangiiffigineqarnissaminnut utaqqipput. Pissutsit taamaannerat Naalakkersuisunit naammagineqanngilaq.

”Suliat innuttaasut iluaquserniarlugit sukkanerusumik suliarineqartalernissaat Naalakkersuisunit sulissutigineqarpoq” Naalakkersuisoq Sara Olsvig oqarpoq, nangillunilu: ”Naalakkersuisooqatigiinnissamik isumaqatigiissut naapertorlugu suleriaatsit, aalajangiisarnerit sullissinerillu pitsanngorsarnissaat Naalakkersuisunit sulissutigineqarpoq taamaaliornikkut innuttaasut sullinneqartarneri pitsanngorsaaffigalugillu assigiiaarnerusumik ingerlanneqarsinnaaleqqullugit”.

Oqallinneq malinnaavigalugu eqqarsartoqarsinnaavoq inatsisissatut siunnersuummi saqqummiunneqartumi kommunini suleriaatsit taamaallaat pineqartut aammalu siunnersuut akuerineqarpat kommuninut annertunerusunik suliakkersuutaalissasoq. Tamannali eqqortuunngilaq.

"Isumaginninnermi Naammagittaalliuuteqartarfiup sulianik ingerlatsinerata pitsanngorsaaffigineqarnissaanik siunnersuummi Isumaginninnermi Naammagittaalliuuteqartarfimmi namminermi suleriaatsit kisimik pineqarput. Naalakkersuisut isumaqarput allaffissornikkut suleriaatsit suliat pitsaassusissaat pilliutiginngikkaluarlugit pitsaanerulersinnissaanik periarfissaqartoq” Naalakkersuisoq Sara Olsvig oqarpoq.

Siunnersuummi siunertarineqartoq tassaavoq suliap naammattunik paasissutissartaqarluni Isumaginninnermi Naammagittaalliuuteqartarfimmi suliarineqalerneraniit innuttaasup aalajangiinermik tigusinissaanut suleriaatsip naammassiuminarsarneqarnissaa.


Annertunersumik paasisaqarusuttut Naalakkersuisup allattaa Nina Jul Larsen tlf. 539371 aqqutigalugu attavigisinnaavaat.