APN malittarisassat naapertorlugit sulivoq

Fiskefartoej

Aalisarnermut Piniarnermullu Naalakkersuisoqarfik tusarniaanermi piffissaliunneqartussat tunngavigalugit piffissaliivoq. Tusarniaaneq sapaatit akunnerini sisamani sivisussuseqarsinnaatitaavoq.

Transparency Greenland nutaarsiassaqartitsivimmut Sermitsiaq. AG-mut ataasinngornermi septembarip 25-anni saqqummersumut uparuaalluni oqarpoq aalisarnermut inatsisissatut siunnersuut sikkisaanngitsumik suliarineqarsimasoq.

Peqatigiiffiullu ilanngullugu oqaatigaa tusarniaanissamut piffissaliunneqarsimasoq sapaatip akunnerini tallimaannarni pisussaanera aamma uparuarpaa. Inatsisissatullu siunnersuut kukkuneqarmat killigitinneqartoq ulluni tallimani sivitsorneqartoq.

Matumuuna erseqqissarusuppara tusarniaanissamut piffissaliunneqartoq pillugu Namminersorlutik Oqartussat inatsisiliornermi 2011-meersut malittarisassai naapertorlugit suliaqarsimammat, Aalisarnermut Piniarnermullu Naalakkersuisoqarfimmi pisortaaneq, Jørgen Isak Olsen oqarpoq.

Namminersorlutik Oqartussat inatsisiliornermi 2011-meersut malittarisassaani erseqqissaassutigineqarpoq siunnersuutigineqartup  paasiuminaatsuunera paasiuminartuuneraluunniit ilaatigut tunngaviulluni tusarniutigineqartoq piffissalerneqartassasoq.

Allanik siunnersuutigineqartumut tunngasunik tusarniaanissaq pisariaqartinneqassappat, sulinngiffeqarnerit ilaalu ilanngullugit sivisussusissaanut tunngavigineqartassallutik.  Malittarisassarli pingaarnerpaasoq taassaavoq sapaatip akunnerini sisamani tusarniutigineqartoq sivisussuseqartassammat.

Uggornarpoq Transparency Greenland uparuaammat tusarniaanermut piffissaliuunneqartartut  malittarisassat  ilisimaarinagit.

Malittarisassaani ilaatigut allassimasoqarpoq tusarniaaffigineqartussat ataasiakkaat sivikinnerusumik piffissalerlugit tusarniaaffigineqarsinnaanissaat pillugit isumaqatigiissusiortoqarsinnaavoq. Naalakkersuisut KANUKOKA-mik isumaqatigiissuteqarput sivikinnerpaamik sapaatip akunnerini tusarniaasoqarsinnaassasoq.

Aamma inatsisissatut siunnersuut isornartorsiorneqarpoq europami inuit pisinnaatitaaffii pillugit isumaqatigiissummik aamma Inatsisit tunngaviusut paragraf 73-iannik ilaqartinnginnerarlugit.

Naalakkersuisoqarfiup inatsisissatut siunnersuusiornermini tunngavilersuutit assigiinngitsut nalilersuutigisimavai aamma  europami inuit pisinnaatitaaffii pillugit isumaqatigiissut aamma Inatsisit tunngaviusut paragraf 73-iat aamma ilaatinneqarlutik.  Inatsisissalli nalinginnaasumik nassuaasiorneqarnera tupinnanngitsumik killeqartinneqarpoq.

Transparency Greenlandip inatsisissatut siunnersuut sikkisaanngitsumik suliarineqarneqarnerarlugu tikkuarpaa. Erseqqissaassutigineqassaaq tusarniuummik nassitsisoqartillugu, inatsisissatut siunnersuutigineqartoq tusarniuutigineqarnerani, akissutigineqartut tunngavigalugit naleqqussarneqartussaammat.

Inatsisissatut siunnersuummut tusarniussutit inatsisissamut ilanngunneqareerpata, siunnersuutigineqartoq Namminersorlutik Oqartussat inatsisinut tunngasunik suliarinnittarfianut taamatuttaaq Inatsisartut inatsisinut tunngasunik suliarinnittarfianut suliassanngortinneqarluni nassiunneqassaaq.

Attavigineqarsinnaavoq Aalisarnermut Piniarnermullu Naalakkersuisoqarfimmi pisortaaneq, Jørgen Isak Olsen. Email: jio@nanoq.gl