Akisussaassuseqartumik imigassartoriaaseqarnissaq anguniagaavoq

Peqqissutsimut Naalakkersuisoq, Agathe Fontain, imigassaq pillugu inatsisissatut siunnersuut nutaaq pillugu ataasinngormat Nuummi Katersortarfimmi oqallitsitsilluni ataatsimiisitsimmat peqataasut inuusuttut utoqqaallu 40-nit amerlanerusut peqataapput.

-”Inuiaqatigiinni imigassaq annertuunik ajornartorsiulersitsivoq. Ernguttarneq atugaasorujussuuvoq, tamatumalu sumiginnaaneq, nakuuserneq kannguttaatsuliornerlu malitsigikkajuttarpai. Meeqqat inuusuttullu imigassap inuiaqatigiinnut sunniutaanut ajortunut illersornissaat imigassaq pillugu inatsisissatut siunnersuutip tunuliaqutaraa. Inatsit kisimi isumalluutaassanngilaq, kisianni innuttaasut tamarmik pitsaasumik sivisuumillu inuuneqalernissamut pitsaanerpaanik periarfissaqarnissaannik anguniakkamut alloriarneruvoq pingaarutilik”, taama Peqqissutsimut Naalakkersuisoq imigassaq pillugu inatsisissatut siunnersuut pillugu saqqummiussigami oqarpoq.

Tamatuma kingorna Kelly Berthelsen imigassamik hashimillu nammineq misilittakkani pillugu saqqummiivoq. Aamma imigassap inuiaqatigiinni nalinginnaassusaa kiisalu kulturini allani imigassartortannginnerup imigassartortarnermit nalinginnaanerunera eqqartorpaa. Taamaalilluni saqqummiinera imigassartoriaaseq aamma inuiaqatigiinni imertariaatsip kissaatigisatta qanoq ataatsimut anguniarsinnaagipput pillugu oqallinnissamut aallarniutaavoq.

Eqimattat arlallit eqqartorpaat inuiaqatigiinni imertariaaseq ataasiinnaanani arlaliusut. Inuiaqatigiinni amerlasuut imigassartorneq ajorput, ilaat ilaanneeriarlutik imigassartortarput allallu ajoqutaasumik imigassartoriaaseqarlutik, tassa piffissami sivikitsumi, pingaartumik akissarsiffiup nalaani, imigassanik amerlasuunik imertarput.

Peqataasut amerlasuut inuiaqatigiinni akisussaassuseqartumik imertariaaseqarnissatta anguniarneqassasoq isumaqatigiissutigaat. Anguniagaq tamanna qanoq anguneqassasoq isumaqatigiissutigineqanngilaq. Peqataasut ilaat isumaqarput imigassamik tuniniaasarnermut imigassartortitsisarnermullu piffissat ammasarfiit sivitsornerisigut peqqinnarnerusumik imigassartoriaaseqarneq pilersinneqassasoq, allalli imigassaq pillugu sukannernerusumik inatsisiliortoqarnissaanik tapersiillutik.

Imigassartorluni festernernut taartaasunik imigassartaqanngitsumik peqqinnartunillu aaqqissuussinerit pisariaqartinneqartut arlalinnit eqqaaneqarpoq. Arlallit erseqqissumik oqaatigaat inuup imigassartorusunnerluni imigassartorniarnerluniluunniit nammineq aalajangissagaa, aamma inuunini nammineq akisussaaffigigaa. Tamatumani Agathe Fontain akivoq imertariaatsimit qanoq ittumit inuunerminni sunnerneqarniarlutik namminneq aalajangiisinnaanngitsut, tassa meeqqat inuusuttullu, illersussallugit politikeritut suliassaralugu.

Imigassaq pillugu Inatsisartut inatsisissaattut siunnersuut sisamanngorpat septembarip 28-anni siullermeerneqalerpat imigassaq pillugu oqallinneq Inatsisartuni nanginneqaqqissaaq.

Paasisaqarnerujumallutit attavigiuk Naalakkersuisup allattaa Nauja Møller mobilikkut +299 58 26 54.