Kalaallit Nunaat FN-ip meeqqat pisinnaatitaaffii pillugit isumaqatigiissutaanut misilitsissimavoq

15. september 2017 Kalaallit Nunaat, Savalimmiut Danmarkilu meeqqat pisinnaatitaaffii pillugit Naalagaaffiit Peqatigiit ataatsimiititaliaannut misilitsinnissamut qaaqquneqarsimapput. Kalaallit Nunaat ilaatigut meeqqat akornanni piitsuussuseq, meeqqat tapersersorneqarnissaannut inatsit nutaaq, meeqqat innarluutillit pisinnaatitaaffii, meeqqat kinguaassiutitigut kannguttaatsuliorfigineqarnikut kiisalu meeqqat aanngajaarniutinik atornerluisartut pillugit aperineqarsimavoq.

Naalagaaffiit Peqatigiitinni misilitsinnerit tassaapput uagut naalakkersuisutut pitsaanerusumik inuit pisinnaatitaaffiinik malinninnissamik eqquutsitsinissamillu qulakkeerinninnerit. Nuannaarutigaara meeqqat pillugit suliavut meeqqallu pisinnaatitaaffii pillugit ukioq manna misilitsittoqarmat. Kalaallit Nunaata misilitsereernerata kingorna oqaaseqaatit innersuussutillu Kalaallit Nunaannut tunniunneqartut Naalakkersuisuni eqqummaariffigissavavut, taamatuttaaq Naalakkersuisut qulakkiissavarput innersuussutaasunut iliuuseqarnissaq" Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoq Sara Olsvig oqarpoq.

11. maj 1993-imi Kalaallit Nunaat FN-ip Meeqqat Pisinnaatitaaffii pillugit isumaqatigiissutaanut ilannguppoq. Kalaallit Nunaata ilanngunnikkut pisussaaffigilerpaa innuttaasut politikkikkullu pisinnaatitaaffiit taamatuttaarlu aningaasaqarnikkut, inuiaqatigiittut kiisalu piorsarsimassutsikkut pisinnaatitaaffinnut tunngatillugit nunami namminermi inatsisitigut maleruagassat allaffissornikkullu suleriaatsit meeqqat pisinnaatitaaffiinut naapertuuttunngortissallugit. Taassuma saniatigut Kalaallit Nunaata FN-ip Meeqqat Pisinnaatitaaffii pillugit isumaqatigiissutaanik naammassinninnissamut siuariaatsit suliniutigisimasallu aalajangiussimasani pillugit ukiut tallimakkaarlugit FN-ip Meeqqanut ataatsimiititaliaanut nalunaarusiarisassavai. Kalaallit Nunaata nalunaarusiaa danskit naalagaaffiata nalunaarutaanut ilaasarpoq nalunaarusiarlu kingulleq tallimaallu ataatsimiititaliamut 2016-imi nassiunneqarpoq.  Nalunaarusiorneq tamanna tunuliaqutaralugu Kalaallit Nunaat ulloq 15. september misilitsippoq.

Kalaallit Nunaat misilitsereeruni ataatsimiititaliamiit oqaaseqaatinik innersuussutinillu tunineqassaaq. Innersuussutit ilaatigut Kalaallit Nunaata isumaqatigiissummik malinninnissamik qulakkeerinninnissaanut pitsaanerusumik iliuuserisinnaasaatut siunnersuutinik imaqarput. Matuma kingorna Naalakkersuisut innersuussutinut malitseqartitsinissamut isummersussapput. Ataatsimiititaliap oqaaseqaatai innersuussutaalu oktober 2017-imi naammassineqarnissaat naatsorsuutigineqarpoq.

Paasissutissanik amerlanerusunik pissarserusukkuit immikkoortortami pisortaq Kirsten Olesen e-mailikkut: kiol@nanoq.gl pissarsiarisinnaavat.