Kalaallit Nunaat Inunnut Innarluutilinnut illersuisoqalerpoq

Nuannaarutigeqaara Naalakkersuisuniit Christina Johnsenip Kalaallit Nunaanni siullersaalluni inunnut innarluutilinnut illersuisutut toqqarneqarnera maanna nalunaarutigisinnaanngoratsigu.

Inatsisartut 2017-imi upernaakkut pisinnaatitaaffiit pillugit suliffeqarfimmik pilersitsinissaq pillugu inatsit nutaaq akuersissutigaat, tassani inuit innarluutillit pisinnaatitaaffii qulakkeerneqarnerilu ukkatarineqassapput. Inunnut innarluutilinnut tapersersuisarnerup pitsaanerulersinneqarnissaa Naalakkersuisut annertuumik sulissutigaat isumaqarpugullu illersuisoq inuit innarluutillit pisinnaatitaaffiinik ukkatarinnittutut sinnerlugillu oqaaseqartartutut inuit innarluutillit atugaasa pitsaanerulernissaannik qulakkeerinninnissami pingaarutilittut inissisimassasoq.

Christina Johnsen Inuit Innarluutillit illersuisuat pillugu Inatsisartut inatsisaat nr. 1, 29. maj 2017-imeersoq naapertorlugu ukiuni pingasuni Inuit Innarluutillit illersuisuattut atorfinitsinneqarpoq. Christina Johnsen ulloq 1. november 2017 atorfinitsinneqassaaq. Christina Johnsen inatsisilerituutut ilinniagaqarpoq eqqartuussiveqarnerullu iluani suliaqarnermik misilittagaqarluarluni. Inuiaqatigiinni sanngiinnerpaat Christina Johnsenip tunniussimalluarluni sullittarsimavai, pingaartumillu eqqartuussisutut tamatumalu kingorna illersuisutut pisinnaatitaaffiinik soqutiginnilluarsimalluni, taakkununnga ilanngullugit innuttaasut innarluutillit imaluunniit inuit annertuumik innarluutillit.

Christina Johnsenip inunnut innarluutilinnut illersuisutut inuit innarluutillit taakkulu ilaqutaasa pisinnaatitaaffii soqutigisaallu siuarsarlugit sulissutigissavai - kiisalu inuit innarluutillit naammagittaalliuuteqarniaraangata siunnersorlugillu ilitsersortassavai aamma suliani pineqartunut attuumassuteqartuni tusarneqartarnissaat qulakkiissavaa. Inuit Innarluutillit illersuisuat naalakkersuinikkut arlaannaannulluunniit pituttorsimanngilaq pissutsillu illersuisup suliaqarfiinut attuumassuteqartut pillugit killilersorneqarnani oqaaseqarsinnaalluni. Inuit innarluutillit illersuisuat inuit innarluutillit illersuisuata allaffeqarfiani Sisimiuniittussami pisortaassaaq.

”Nuannaarutigeqaara inunnut innarluutilinnut illersuisussamik maanna toqqaasoqarmat. Toqqaaneq inuit innarluutillit atugaasa pitsaanerulersinneqarnissaannik pisinnaatitaaffiisalu eqqortinneqarnissaannik neriuuteqalersitsivoq. Qilanaaraara inuit innarluutillit illersuisuata suliaanut malinnaanissara. Naalakkersuisuni nuannaarutigaarput inuit innarluutillit atugaasa ukiuni makkunani immikkut ukkatarineqarnerat. Inuiaqatigiinni ataatsimoorluta suliaqarfimmi tassanerpiaq naligiimmik pinninnerulernissaq qulakkiissavarput” Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoq Sara Olsvig oqarpoq.

Paasisaqarnerorusukkuit immikkoortortaqarfimmi pisortaq Kirsten Olesen e-mail: kiol@nanoq.gl aqqutigalugu attavigiuk.