Meeqqanik kinguaassiutitigut atornerluisarnerup annertunerusumik sammineqarnissaa

Kalaallit Nunaanni Eqqartuussiveqarneq pillugu Siunnersuisoqatigiit septembarip 17-ianit – 19-ianut  Tasiilami ukiumoortumik ataatsimiittarnitik ingerlassimavaat, tassanilu meeqqanik kinguaassiutitigut atornerluisarnernik akiuiniarneq sammineqarsimavoq.

Meeqqanik kinguaassiutitigut atornerluisarneq pillugu sulianut isumaginninnermi oqartussat, politiit, eqqartuussiviit pinerluttunillu isumaginnittoqarfiit akuutinneqartarput. Kalaallit Nunaanni Eqqartuussiveqarneq pillugu Siunnersuisoqatigiit  - pinaveersaartitsinermut, pinerlussimasunik paasiniaasarnermut, eqqartuussisutigoortumik suliaqartarnermut aammalu inuiaqatigiinnut akuleruteqqissinnaanermut tunngatillugu pisortaqarfiit akornanni suleqatigiinnerup nukittorsarneqarsinnaanera  eqqartorpaat.  

Kalaallit Nunaanni Eqqartuussiveqarneq pillugu Siunnersuisoqatigiinnut Siulittaasoq, eqqartuussiviit qullersaanni eqqartuussisoq Jens Kruse Mikkelsen oqarpoq:

"“Kalaallit Nunaanni meeqqanik kinguaassiutitigut atornerluisarneq annertuumik ajornartorsiutaavoq. Taamaattumik Kalaallit Nunaanni Eqqartuussiveqarneq pillugu Siunnersuisoqatigiit ajornartorsiummik sammisaqalernera aammalu oqartussat ataatsimoorlutik pineqartumut tunngatillugu suleqatigiittarnerisa nukittorsarneqarnissaanik sammisaqalernera pingaaruteqarpoq. Qularutiginngilara Siunnersuisoqatigiinni ilaasortat pineqartunut tunngatillugu annertunerusumik sammisaqartalernissap pisariaqartinneqarneranik ilisimasaqarnerulersimallutik Tasiilamit utissasut.”

Tunuliaqutaasut

Kalaallit Nunaanni Eqqartuussiveqarneq pillugu Siunnersuisoqatigiit suliassaraat pinerluttulerinermut inatsisip aamma eqqartuussisarnermut inatsisip Namminersorlutik Oqartussat naalagaaffiullu oqartussaasuisa akornanni ataqatigiissaartarnissaat.

Siunnersuisoqatigiinnut Siulittaasoq tassa eqqartuussiviit qullersaanni eqqartuussisoq Jens Kruse Mikkelsen. Sinniisoqatigiinnut ilaatigut ilaasortaapput Namminersorlutik Oqartussanit, Justitsministeeriaqarfimmit, politiinit, eqqartuussivinniit pinerluttunik isumaginnittoqarfimmillu aallartitat.

Sinniisoqatigiit pillugit uani annertunerusumik atuagaqarsinnaavutit.

Sukumiinerusumik paasisaqarusuttut attavigisinnaavaat: Isumaginninnermut, Ilaqutariinnut, Naligiissitaanermut Inatsisinillu atortitsinermut Naalakkersuisoqarfimmi AC-fuldmægtig Stephanie Marie Fisker, oqarasuaat: +299 34 60 18