Imigassaq pillugu Ilulissani innuttaasunik ataatsimiisitsineq

Peqqissutsimut Naalakkersuisoq Agathe Fontain imigassaq pillugu inatsisissatut siunnersuut, ukiakkut Inatsisartut ataatsimiinneranni septembarip 28-anni siullermeerneqartussaq, pillugu Ilulissani innuttaasunik ataatsimiisitsereerluni Nuummut utersimalerpoq.

Ataatsimiisitsinermi innuttaasut najuuttut amerlanngikkaluartut assut oqalliseqataarusupput.

Inatsisissatut siunnersuummik tapersiisut akerliliisullu peqataapput. Kommunimi politikerit peqataasut ilaasa pisiniarfiit neriniartarfiillu matunerisa kingorna innuttaasut amerlasuut unioqqutitsillutik imigassamik tuniniaasarnerat annikillisinniarlugu imigassamik tuniniaasarnermut ammasarfiit sivitsorneqassasut kissaatigaat.

Agathe Fontain isumaqanngilaq tamanna eqqortuusoq, tassami imigassamik inatsimmi suliaqarnermi inatsisinik unioqqutitsisut innimigineqarnatik meeqqat inuusuttullu innimigineqassammata.

-”Tamatta akisussaaffeqarpugut, unioqqutitsillutillu imigassamik tuniniaasut takugutsigit isertuarnatik inatsisinik unioqqutitsisut nipangerluta akuersaaginnarnagit nalunaarutigisussaavavut,” taama Peqqissutsimut Naalakkersuisoq, Agathe Fontain, oqarpoq.

Eqimattakkaarluni oqallinnermi imigassamut tunngatillugu kulturi imigassartoriaatsillu naleqqutinngitsup, silaarunnissap tungaanut ernguttarnerup, aaqqinnissaannut siunnersuutit eqqartorneqarput.

Eqimattat ilaat meeqqat unnukkut qanoq sivisutigisumik aneersinnaanerat inatsisitigut killilerneqarnissaannik siunnersuuteqarput. Eqimattanut peqataasut unnukkut nal. 22 siunnersuutigaat. Eqimattanut peqataasut Islandi isumassarsiorfigaat, tamatumani meeqqat minnerit nal. 20 meeqqallu annerit nal. 22 ukiakkut ukiukkullu meeqqat atuarnerisa nalaanni angerlartarnissaat inatsisitigut piumasaqaatigineqarpoq. Meeqqat inuusuttullu akornanni ikiaroortarneq pitsaaliorniarlugu Islandimi inatsit taanna atuutilerpoq.

Agathe Fontain Ilulissaniinnini iluatsillugu Perorsaanermik Ilinniarfimmi, PI-imi, ilinniartunut ilinniartitsisunullu saqqummiivoq. Tamatumani amerlasuut, 50-init sinnerlugit, peqataapput. Ilinniartut inatsisissatut siunnersuut taperserpaat, oqaatigaallu inatsimmi meeqqat inuusuttullu pingaartinneqarnerat naammagisimaarlugu.

Tulliani inatsisissatut siunnersuut pillugu innuttaasunik ataatsimiisitsisoqassaaq Nuummi katersortarfimmi ataasinngorneq septembarip 25-anni nal. 19-21.30, matumani Agathe Fontainip neriuutigaa amerlasuut peqataassasut oqallilluartoqarumaartorlu.

Paasisaqarnerujumallutit attavigiuk Nauja Møller mobilikkut +299 58 26 54.