Vestnorden Travel Martimik ammaanersiorneq

Tusagassiorfinnut nalunaarut – Nuummi Vestnorden Travel Mart 2017 Hans Enoksenip ammarpaa

Ullumikkut Vestnorden Travel Mart 2017-imi peqataasunut ammaanersiornermi oqalugiartuuvoq Inuussutissarsiornermut, Suliffeqarnermut, Niuernermut Nukissiuuteqarnermullu Naalakkersuisoq, Hans Enoksen.

Nunarsuup immikkoortuani tamarmi takornariartitsinerup ineriartortitaanerata nukittorsarnissaa siunertaralugu Kalaallit Nunaata, Islandip aamma Savalimmiut akornanni suleqatigiinnikkut Vestnorden Travel Mart ingerlanneqarpoq.

Piffissami 18. septembarimit 21. septembarimut nunarsuarmit tamarmit peqataasussat naapissavaat Savalimmiunit, Islandimit aamma Kalaallit Nunaannit angalatitsisartut, nunat avannarliit killerni misigisassanik periarfissarpassuit pissanganartut takusarlugit.

Aamma ukiormanna nunat avannarliit killernit tikiffissarpassuit tikeraartut amerlassusaasigut malunnartumik siuariarnermik misigisaqarsimapput. Ingammik Islandimi pisoqartoqarpoq – siuariarneq allaanani sunik tamanik qaangiisoq. Aammali Savalimmiuni aamma Kalaallit Nunaanni takornariartitsineq sukkasoorujussuarmik ineriartortitaavoq.

”Pinngortitaq aserugaanngitsoq, asseqanngitsunik kultureqarnermik misigisassat minnerunngitsumillu nunarsuarmi pitsaassusilinnut ajukkunnanngitsunik nerisassiassanik tunngaveqartunik tupinnaannartunik nerisassatigut misigisassat neqeroorutigisinnaaneri nunatsinni pingasuni ataatsimoorussamik pigaavut. Pisuussutillu taakku inuussutissarsiornermut tunngatillugu atugarinerinut naleqqiullugit takornariartitsineq suli annertusiartuinnartumik atuuffeqarpoq”, ilaatigut oqalugiaammini Hans Enoksen oqarpoq.

Nuummi ullut siuliini kingornatigullu nunani allani angalatitsisartut Kalaallit Nunaanni, Islandimi aamma Savalimmiuni isumassarsiorfissatut angalatitaanerni peqataasinnaasimapput, taamaalillutik tikiffissat pissanganartut namminneq misigisinnaaniassammatigit.

Travelmart ataatsimeersuarnermik aallartinneqarpoq, tassani ilaatigut nunanik ataasiakkaanik takornariartitsinermik isumasioqatigiit pingasut saqqummiussillutik, ataatsimeersuarnermi pingaarnertut oqalugiartut angalanermik allanngortitsisumik, inuit inuunerminni atajuartussanik allannguinissaminnut isumassarsisitsisutut angalanermik sammisaqarlutik.

”Inunnik isumassarsisitsinissamut pinngortitap nukinga annerpaat ilaattut isigaara, Hans Enoksen oqarpoq. Nunanilu Avannarlerni Killerni nassuiarneqarsinnaanngitsunik pinngortitami misigisassarpassuit ipput – pinngortitami nukiit allaat tulleriiaatiinnarput.

Aaqqissuussineq business-to-businessitut niuernermi saqqummersitsinertut taaneqartartoq nunarsuarmit tamarmit pisisartunik kajumigineqarpoq. Ineriartortoqarnermilu aaqqissuussinerup Vestnorden Travel Martitut ittoq suli annertunermik ingerlatitsilersinnaanissaa neriuutigineqarpoq.

Annerusumik paasissutissinneqarniaraanni attavigineqassaaq Naalakkersuisoqarfimmi pisortaaneq Jørn Skov Nielsen, mobil 556188