Persuttaasartunut katsorsarneqarnissamik neqeroorut iluatsilluartoq

Oktober 2016-imiilli inuit inooqatigisaminnut persuttaasartut Alliaq-mi katsorsarneqarnissaminnut periarfissinneqarput. Alliaq kinaassutsimik isertuussilluni katsorsarneqarnermik ingerlatsinernik akunnernik 8-kkaanik sivisussusilinnik neqerooruteqartarpoq, mannalu tikillugu arnat angutillu 22-t naammassillutik katsorsartissimapput. Innuttaasut 14-it maannakkorpiaq katsorsartinneqarput. Alliaq-mi katsorsaanikkut anguniagaasoq unaavoq, persuttaasartunit persuttaasimanerup akisussaaffigineqarnissaa inooqatiminnullu persuttaasimanerminnut unitsitsisinnaaneq ilinniarneqassasoq.

Persuttaaneq katsorsaanerup malunnartumik annikillisittarpaa.
Psykolog/terapeut-imik naammassillugu katsorsarneqarnermik ingerlatsereernermi persuttaasartumut inooqataasup kinaassutsiminik oqaatiginninnani apeqqutit immersugassami allassimasut akissavai. Tassani inooqataasup nalilissavaa katsorsaaneq ingerlaannarsimanersoq imaluunniit nangeqqiisoqarsimanersoq.

”Manna tikillugu inooqataasunit nalunaarutiginneqqittarnertigut takusinnaavarput, timikkut persuttaasarneq tamakkiisumik unitsinneqarsimasoq eqqarsartaatsikkullu persuttaasarneq malunnartumik annikillisinneqarsimasoq”, Alliaq-mut psykologitut ilinniagaqarsimalluni ataqatigiissaarisartoq Preben Svoldgaard Larsen oqaluttuarpoq. Peqatigitillugu misissuinerup takutippaa, inooqatigiit nalileraat persuttaasartup akerleriittarnernik aqutsisinnaanermik piginnaasaqarnera assut pitsanngoriarsimasoq aammalu aappariinneq pitsaanerulersimasoq.

Ilaqutariinnut meeqqanulluunniit persuttaasarnerup ajoqusiisarnera Alliaq-mi katsorsartinneqarnissamik peqataanissamut aalajangiisuusumik kajumissaataavoq. Arnat angutillu inooqatigisaminnut persuttaasartut, amerlanerpaatigut eqqissisimasumik asannittumillu aappariinnissamik kissaateqartarput. Kisianni eqqarsaqqaarani periataartarnerit kamattarnerillu aqunnissaat ajornartorsiutigisarpaat. Amerlanerpaatigulli ilisimasarpaat persuttaanerup meeqqatik aamma ajoqusertaraat, tamannalu qaniginerpaasanut persuttaasarnerup unitsinneqarnissaanik unitsitsiniarluni ilinniagaqarnermik suliaqarnermut sakkortuumik kajumissaataasartoq.

Kalaallit Nunaannut tamarmut neqeroorut
Alliaq Qaqortumi, Nuummi, Sisimiuni Ilulissanilu psykologeqarpoq katsorsaasartoqarlunilu. Immikkulli ittumik katsorsartinneqarnissamik ingerlatsinerit aammattaaq oqarasuaat aamma Skype atorlugit neqeroorutigineqartarput.
Alliaq Kalallit Nunaannit tamanit saaffiginnissutsinik pissarsiaqartarpoq, Kujataani Narsamiit Avannaani Qaanaamut - Kitaani Nuummiit Tunumi Kulusummut, Tasiilamut aamma Ittoqqortoormiinut.

Alliaq-mut oqarasuaatikkut attaveqartarneq
Alliaq-mi oqarasuaatikkut paarsisuusut toqqaannartumik attaveqarfigineqar-tarsinnaapput ataasinngornerit sisamanngornerillu tamaasa nal. 20-miit 22-mut oqarasuaat 34 50 40 atorlugu. Nittartakkami: www alliaq gl-imi katsorsartinneqarnissamik neqeroorut pillugu sukumiinerusumik paasissutissanik pissarsisoqarsinnaavoq.

Alliaq pillugu sukumiinerusumik paasissutissat pillugit, Majken Vith Tangkjær, Isumaginninnermut Aqutsisoqarfik attaveqarfiguuk. Tlf: 346639/ Mail: mavt@nanoq gl