Ilinniagaqarnerup iluani unammillernartoqarpoq – taamaattorli ilorraap tungaanut ingerlasoqarpoq

Sisamanngorneq Septembarip 14-ianni, 2017, Aningaasaqarnermut Siunnersuisoqatigiit nalunaarusiartik, ilaatigut ilinniagaqarnermut sammisoq, saqqummiuppaat.

Siunnersuisoqatigiit ilaatigut annilaanngatigaat, ilinniagaqarnerup iluani allannguineq kigaappallaassappat, atuartunik ukioqatigiiaanik arlalinnik katataqarnissaq.

Pingaaruteqarpoq naqissusissallugu taama pisoqarnavianngimmat. Ilinniagaqarnerup iluani nutaaliornerup saniatigut, eqeersimaarluni iliuuseqartoqartoqartuarpoq.

2015-imi ilinniartitsisunngorniarnerup nalilersuiffigineqarnerani paasinarsivoq, meeqqat atuarfiat tassaasoq ilinniagaqarniarnerup iluani iliuuseqarfissaq pingaarneq.

Ilaatigut tamanna pillugu, atuarfinni tamani piukkunnartunik ilinniarsimasunillu sulisoqarnissaq Naalakkersuisut sulissutigissavaat. Taamaammallu atuarfinni pisortaaqatigiit piginnaasaat inerisarneqassapput, atuarfinni pisortaaqatigiinnut ilinniaqqinnissamik, pisortanngornissamik siunertaqartumik neqeroornikkut. Taakku saniatigut aamma Naalakkersuisut pingaartippaat atuarfiit angerlarsimaffiillu akunnerminni suleqatigiinnerisa nukittorsarneqarnissaat.

Pilersaarutit assigiinngitsut Ilinniartitaanermut Pilersaarut ll-mi takuneqarsinnaapput, uani: http://naalakkersuisut.gl/~/media/Nanoq/Files/Publications/Uddannelse/NYUddannelsesplan%202017%20web.pdf

Aap, ilinniartitaanerup iluani unammillernartoqarpoq. Taamaattorli akisussaaffiup aaliangersimasumut tutsinnissaa mianersuutigissavarput. Tamatta akisussaaffimmik kivitseqatigiittariaqarpugut, - Naalakkersuisut, kommunalbestyrelsit, atuarfiit angajoqqaallu,” taama oqarpoq, Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq, Doris J. Jensen, nangillunilu:

Naak ilinniartitaanermi unammillernartoqaraluartoq pingaaruteqarpoq eqqaamassallugu, aqqut ajunngitsoq atoratsigu. Ukiut quliinnaat ingerlanerini, piffissami 2005-2015-imi, meeqqat atuarfianniit naammassereerlutik ilinniaqqittartut 98 %-imik amerlisimapput. Ilinniakkaminnillu naammassinnittartut 55%-imik amerleriarsimallutik. Tamanna tanngassimaarutissaavoq.”

Annertunerusumik paasisaqarusukkuit uunga saaffiginnigit, Naalakkersuisup allattaa Rosa Thorsen, rosat@nanoq.gl, +299 553303