Nunani avannarlerni killerni peqqissutsimut naalakkersuisut ataatsimeeqatigiinnerat iluatsilluarpoq

Peqqissutsimut Naalakkersuisoq, Agathe Fontain, ulluni 29. -30. august nunani avannarlerni killerni peqqissutsimut naalakkersuisut ataatsimeeqatigiinneranni qaaqqusisuuvoq. Ataatsimeeqatigiinnermi anguniarneqartoq tassaavoq nunat akornanni ilisimasanik misilittakkanillu aviteqatgiinnissaq aammalu nunani pingasuusuni taakkunani peqqissutsimut naalakkersuisut suleqatigiinnerisa annertusarneqarnissaa.

”Islandimi Savalimmiunilu naalakkersuisutut suleqatima suleqatiginerat nuannareqaara. Naak nunarput, Islandi Savalimmiullu sorpassuartigut assigiinngissuseqaraluartut peqqissutsimut tunngasutigut unammilligassavut assigiipput. Taamaattumillu misilittakkatsinnik avitseqatigiilluarsinnaalluta, ” taama oqarpoq Peqqissutsimut Naalakkersuisoq nangillunilu:

”Innuttaasut ikittuinnaalluta isorartuumik inissisimalluta inuuvugut aammalu peqqissaanermik sulisunik pisariaqartitanik sulisussarsiorneq eqqarsaatigalugu unammilligassagut assigiillutik. Taamaattumillu innuttaasut peqqissutsip tungaatigut pitsaasumik sullisissagutsigit pilersitassat nutaat eqqarsaatigisariaqarpavut. Tamatumani misilittakkagut atorluarsinnaavavut, taamaalillutalu tamatigut nutaanik ujartuisariaqarnata.”

Nunatsinni peqqinnissaqarfiup aaqqissugaanera, tassungalu ilanngullugu peqqinnissaqarfiup nunap immikkoortuinut eqitigaanera aammalu nunap immikkoortuinut eqitigaanera aammalu nunap immikkoortuini peqqissaaveqarfiit tallimaasut pilersinneqarnerat Islandimit Savalimmiunillu paasisaqarfigissallugit soqutigineqarput. Aamma telemedicin atorlugit nakorsiartitsinermik nunatsinni misilittakkat aammalu nakorsaatinut aningaasartuutit appasinnerat Savalimmiuni Islandimilu peqqissutsimut naalakkersuisunit paasisaqarfigissallugit soqutigineqarput.

Ulluni ataatsimiiffiusuni marlunni qulequtaa pingaarneq tassaavoq ”Health in all Policies”. Tassalu peqqissutsip siuarsarneqarnissaa sallerpaatinneqarnissaalu. Suliat akimorlugit suleqatigiinneq aqqutigalugu innuttaasunut iluaqutaasumik angusaqarluartoqarsinnaasoq Islandimi misilittakkat takutippaat.

”Qinikkatut suliassaraarput siuttuunissaq aammalu ingerlatsiveqarfiit suleqatigiinnissaasa qulakkeerneqarnissaa. Suut tamarmik ataqatigiinnerat pitsaasumillu inuuneqarnissap qitiutillugit aallunneqarnissaat naalakkersuinikkut ingerlatsisunit qullerpaanit ataatsimut sulissutigineqartariaqarpoq, ” taama oqarpoq Agathe Fontain.

Tarnikkut peqqissuunissaq anguniarlugu siusissukkut iliuuseqarnissap qitiutillugu aallunneqarnissaa pingaaruteqartoq ataatsimeeqatiginnermi oqaatigineqarpoq. Atornerluisunik katsorsaanermik suliniut aammalu imigassaq pillugu inatsisit oqaluuserisat pingaarnersaraat. Imigassaq pillugu inatsisissatut siunnersuummik Inatsisartut ukiakkut ataatsimiinneranni oqaluuserineqartussamik suliaqarnermi Savalimmiuni Islandimilu inatsisit sukannersut Kalaallit Nunaata isumassarsiorfigai.

Suleqatigiinnissamik isumaqatigiissut 2014-imeersoq suleqatigiinnerup ingerlateqqinneqarnissaanut tunngavissaalluartoq aammalu isumaqatigiissutip annertusarneqarnissanut ingerlaavartumik oqaloqatigiittarnissaq naalakkersuisut pingasuusut isumaqatigaat.

Nunani avannarlerni killerni peqqissutsimut naalakkersuisut akornanni tullianik ataatsimiinneq pissaaq Islandimi 2018-imi aggustip qaammataani.

 

Annertunerusumik paasissutissat naalakkersuisup allattaanut, Nauja Møller mobil +299 58 26 54, saaffiginninnikkut pissarsiarineqarsinnaapput.