Karl-Kristian Kruse Atlantikup Avannaani aalisarnermut ministerit ataatsimeersuarneranni

Aalisarnermut Piniarnermullu Naalakkersuisoq, Karl-Kristian Kruse Nunani Avannarlerni Aalisarnermut Naalakkersuisut 22-ssaannik ataatsimeersuarneranni Shediac-imi New Brunswick-im Canadami ingerlanneqartumi peqataavoq, aggustusip 28-aniit 30-ianut 2017.

Ataatsimeersuarneq aalisarnermut Naalakkersuisunik peqataaffigineqarpoq Kalaallit Nunaannit, Island-imit, Savalimmiunit, Rusland-imit, Canada-mit EU-llu aalisanermut kommissærianit. Norge qaffasissumik atorfilimmik peqataatitsivoq.

Pingaarnertut qulequtarineqarpoq nunarsuarmi tamarmi imartat illersorneqarnissaat anguniarneqassasoq.

Nunanit tamalaanit alaatsinaanneqartorujussuuvoq imartat illersornerisigut immami uumasut assigiinngisitaarnerisa illersornissaasa ukkatarineqarnissaat. Canada-p qaaqqusisutut ukioq manna oqaluuserisassani qulequtassatut siunnersuutigisimavaa nunarsuarmi tamarmi immamik illersuinissamik anguniagaqarnissaq Nunani Avannarlerni Aalisarnermut Naalakkersuisut EU-llu aalisanermut kommissæriata oqallisigissagaat.

Canadami aalisanermut imartamullu Naalakkersuisup Dominique LeBlanc-ip aalisarnermi naalakkersuisunut suleqatiminut ilisimatitsissutigaa ataatsimeersuarnermi Shediac-imi ingerlanneqartumi pilersaaruteqarluni angusaqarluarniarumalluni 2017-i naatinnagu imartap 5 %-ia illersorneqassasoq, aammalu 2020 tikitsinnagu 10% angussallugu.

Naalakkersuisut oqallinnerminni unammillernartut aalisarnerup iluani aqutsinermut suliniutissat oqallisigivaat. Misilittakkamikkut assigeequteqarput ilaatigut silaannaap allanngoriartorneranit immami pisussutinut sunniuteqarneratigut, pingaartumik immami miluumasut pillugit. Unammilligassanut ilaapputtaaq unioqqutitsilluni aalisarneq nunarsuarmi tamarmi atuuttoq taassumalu uumasoqatigiinnut sunniutai oqallisigineqarlutik.

Naalakkersuisut uppernarsarpaat, pisussaaffiusoq pingaarutilik imartatta illersorneqarnissaannut nunani avannarlerni nunanut tamanut, naqissuserlugulu illersuineq piujuaannartitsillunilu immap pisuussutaanik atuineq ingiaqatigiittut. Aalisarnermut aqutsinerup iluani sivisuumik misilittagaqarput imartatta illersornissaannut imartat sumiffinni assigiinngitsuni, ilaatigut assersuutigalugu sumiiffiit piffissami sivisuumi aalisarfigeqqusaajunnaartittarnerisigut.

Isumaqatigiissutigineqarpoq, aalajangiinerit immamik illersuinermi ersarissumik suleriaaseqarnikkut aalisarnermik suliallit, peqatigiiffiit nunallu inoqqaavi suleqatiginerisigut ingerlanneqarnissaat.



Naalakkersuisut isumaqatigiissutigaat, immap illersorneqarnissaanut aalajangiinermut suliniutit ilisimatusarnermit aallaaveqarnissaat aammalu najugaqartunit ileqqutoqqallu atorlugit ilisimasalinnit nunallu inoqqaavisa pisinnaatitaaffii malillugit ingerlanneqartassasut. Naalakkersuisoq Karl-Kristian Kruse-p suleqatini ilisimatippai Kalaallit Nunaanni imartatsinnik illersuinerup atuutsinneqarnera pillugu Pinngortitamut Avatagiisimullu Naalakkersuisoqarfik akisussaasuusoq.

Naalakkersuisup Kalaallit Nunaanni nunap ilaanik illersuineq oqaluttuaraa, ilaatigut masarloqarfinnik ilaqartoq killilersuiffigineqartorlu aalisarnermi, piniarnermi, angallatitigut angalanermi, silaannakkut angalanermi allallu. Naalakkersuisup assersuutitut taava Melville-p imartaani nunaqartoq illersukkamik, tassanilu 1989-imili imartaq sinerissamut qanittoq illersugaalersimasoq.

Naalakkersuisup oqalugiarnermini ilisimatitsissutigaa immami avatangiisinut inatsit nutaaq maj 2017-imi Inatsisartunit aalajangerneqarsimasoq, imartatsinni uumasut nerisaqaqatigiinnerini mingutsitsineq pinaversaartinneqassasoq, tassani qularnaarniarlugu mianersortumik- aammalu uumasoqatigiit ingerlarngat illersorlugu ingerlariaaseqarnissaq pillugu, kisianni aamma qularnaarniarlugu, inuiaqatigiit ineriartornerminni piujuaannartitsilluni ingerlariaaseq atorneqassasoq.

Naalakkersuisup naqissuserpaa, nammineq ukkatarisami pingaarnersarigaat piujuaannartitsilluni aningaasarsiornikkut ineriartortitsinissaq. Kalaallit Nunaanni aalisarneq piniarnerlu pingaarutilerujussuupput aalisarnerlu Kalaallit Nunaata avammut tuniniaanerani pingaarnerpaalluni. Taamaattumik pingaaruteqarluinnarpoq imartatta illersornerani politikkikkut piujuartitsilluni immap pisuussutaanik atuinerup ingerlanneqarnissaa imartatsinni uumasoqatigiit illersuutigalugit.

Naalakkersuisup Pikialasorsuaq erseqqissaatigaa Kalaallit Nunaata Canadallu akornanniittoq uumasoqatigiinnut pingaarutilerujussuusoq Kalaallit Nunaatalu immikkut ukkatarigaa. Canadap naalakkersuisuata LeBlanc-ip uppernarsarpaa, Canadamit aamma Pikialasorsuarmik soqutiginninneq.

Uani ataatsimeersuarnermit allakkiaq (Communique) ilanngunneqarsimasoq takusinnaavat her

Naalakkersuisup Karl-Kristian Krusep oqalugiaataa atuaruk

Aalisarnermut Piniarnermullu Naalakkersuisoq Karl-Kristian Kruse ataatsimeersuarnermit Iqalunnut naapitsiartorluni ingerlaqqippoq tassani Nunavummi piniakkat avitseqatigiissutigisagut pillugit isummersoqatigiinnissaq siunertaralugu oqaloqatiginnikkiartorluni. 

Paasisaqarnerorusukkuit attavigisinnaavat Naalakkersuisoqarfimmi pisortaq Jørgen Isak Olsen, tlf.: 48 31 35