North American Nickelip Maniitsup eqqaani misissueqqissaarnermik ingerlatsivianut takuniaaneq

North American Nickel nunatsinni aatsitassarsiorluni suliniuteqartuni pimoorussilluartut ilagaat. Pingaarnertut nikkili misissuiffigineqarpoq, aatsitassalli allat aamma aatsitassarsiorfiup soqutigalugit misissugarai. Aatsitassarsiorfiup ukiuni arlertuni Maniitsup kujataata kangiani piffik misissuiffigaa. Ukioq mannalu aammaarlutik misissueqqissaarnermik annertuunik ingerlatsipput.

Taamaammat Naalakkersuisut suliniummut soqutiginnillutik malinnaapput. Tamannalu Naalakkersuisut Siulittaasuata Kim Kielsenip Aatsitassanullu Naalakkersuisup Múte Borup Egedep sapaammi ulloq 27. august misissuiffimmut takuniaanerannut tunngaveqarpoq.

North American Nickelip ukioq manna suliani juunip qaammataani aallartippai, oktoberillu qaammataani ukioq manna piffimmi misissuinerit naammassineqarnissaat naatsorsuutigineqarpoq. Misissugassanik katersinissat, piffinnik nalunaarsuinissat paasissutissanillu katersinissat, ukioq manna suliniuteqarnermi pilersaarutaapput.

Tamanna helikopteri atorlugu ingerlanneqarpoq, soorluttaaq qillerilluni misissugassat 11.000 meterisut annertussusillit ingerlanneqarniartut. Ukioq manna suliaqarnermi inuit 60-it sinnerlugit sulisinneqassasut North American Nickelip naatsorsuutigaa.

Takuniaanermut atatillugu Kim Kielsen Múte Borup Egedelu ima oqarput:

”Aatsitassarsiornermik ingerlatsisut amerlisarnissaat Naalakkersuisut anguniakkaminni pingaartippaat. Taamaammallu North American Nickelip ukioq manna aammaarlutik suliniutiminnik nangitsinerat iluarisimaartorujussuuarput. North American Nickel aatsitassarsiorfiillu misissuinernik ingerlatsisut allat ilisimasanik nutaanik, siuariartornermik suliffissaqartitsinermillu tamatsinnut iluaqutaasunik pilersitsisuupput.

Tammaarsimaffimmi suliniummik pimoorussineq anguniagaqartumillu suliaqarneq maluginiarparput. Ukioq mannalu qillerinernik annertuunik ingerlatsinerup suliniutip siuariartorluarnera uppernarsarpaa. Taamaammat ukiuni aggersuni suliniutip malinnaaviginissaa qilanaaraarput.”



Paasissutissanik katersineq pillugu paasissutissat

North American Nickel Maniitsup eqqaani ujarassiornermik paasisanik nutaanik pissarsinermut ilapittuivoq. Maniitsup eqqaata ujarassiornikkut paasissutissanik katersiffiginera Aatsitassanut Ikummatissanullu Naalakkersuisoqarfiup ukiuni arlalinni sulissutigaa. Aasaq manna paasissutissanik katersinerup ilaa ujarassiuut Aatsitassanut Ikummatissanullu Naalakkersuisoqarfimmeersut North American Nickelip tamaarsimaffianiinneratigut ingerlanneqarpoq. Helikopteri atorlugu misissuinerit arlallit ingerlanneqarput, taamaaliornermilu ujarassiuut Maniitsup eqqaani piffik misissuiffigaat.

Ujarassiornikkut ilisimasanik nutaanik pissarsiortuarneq aatsitassarsiornermik ingerlatat ineriartortinnissaannut pingaarutilimmik toqqammaviuvoq. Taamaammallu anguniakkamut tassunga Maniitsup eqqaani ujarassiornikkut paasissutissanik katersiviginera pingaarutilimmik ilapittuisuuvoq. North Americdan Nickelip aammaarluni ukioq manna ujarassiuut Maniitsup eqqaani piffinnik misissuinerannik ikorfartuinera suleqatigiilluarnerup akuersaartumillu siunertaqarnerup inerneraa.





Paasissutissanik annertunerusunik uunga saaffiginilluni pissarsisoqarsinnaavoq:



Jørgen T. Hammeken-Holm Naalakkersuisoqarfiup pisortaa - Aatsitassanut Naalakkersuisoqarfik tlf: 346846, e-mail: joeh@nanoq.gl