Nunat avannarlerni killerni peqqissutsimut ministerit Nuummi naapissapput

Ulluni 29. Aamma 30 august Peqqissutsimut Naalakkersuisoq Agathe Fontain Nunat avannarlerni killerni peqqissutsimut ministerit ataatsimiinneranni Nuummi qaaqqusisuussaaq.

Nunani avannarlerni killerni peqqissutsimut ministerit pingasuusut aalajangersimasumik ukiumut ataasiarlutik ataatsimiittarput. Ukiumoortumik ataatsimiinnerit siunertaraat Island, Savalimmiut Kalaallit Nunaallu oqaloqatigiinnikkut, isumassarsianik ilisimasanillu avitseqatigiinnikkut suleqatigiinneq siuarsassallugu.

-”Nunani avannarlerni killermiut ataatsimoorussaqaqaat – minnerunngitsumik peqqissutsikkut tunngasutigut. Assersuutigalugu maani Kalaallit Nunaanni iluarisimaarparput Islandimi napparsimavissuat assigiinngitsunik napparsimasunik suliaqarsinnaanermut periarfissanik isumaqatigiissuteqarfiginikuugatsigu,” taama oqarpoq Peqqissutsimut Naalakkersuisoq, Agathe Fontain, nangillunilu:

- ”Ataatsimiinnermi uani nakorsaatinut aningaasartuutit ilaatigut eqqartussavavut, tarnip pissusaanik tunngassuteqartut misilittakkat aamma pinaveersaartitsinermut misilittakkat eqqartussavavut. Siunertaavoq misilittakkagut ilikkagaqarfiginissaat misissorlugulu suleqatigiinnerup annertusarsinnaanissaanik periarfissaqarnerluta.”

Nunani avannarlerni killerni peqqissutsimut ministerit siullermeerlutik Nuummi 2012-mi ataatsimiipput. Juni 2014-mi Island, Savalimmiut Kalaallit Nunaallu suleqatigiinnissamik isumaqatigiipput nunat taakku pingasut peqqissutsimut Naalakkersuisa akornanni.

Paasissutissanik allanik piniaruit naalakkersuisup allattaa Nauja Møller oqarasuaat: +299 34 66 05, mobil: +299 58 26 54 imaluunniit e-mail: nmoe@nanoq.gl aqqutigalugit attavigineqarsinnaavoq