Kalaallit efterskolertut uniinnartarnerat annertuallaaqaaq

Ilinniartitaanermut Naalakkersuisup Doris J. Jensenip aamma Efterskoleforeningip siulittaasuata Troels Borringip ataatsimoorlutik oqaaseqaataat.

Kalaallit inuusuttut amerlaqisut ukioq ataaseq Danmarkimi efterskolernertik pissarsiaqaatigilluartarpaat, inuttut, ilikkagassatigut minnerunngitsumillu oqaatsitigut inerikkiartuutigilluartarlugu. Tassami kalaallit efterskolertut amerlaqisut Danmarkimi efterskolertarput qallunaatut piginnaasatik annertusarumallugit, ilinniaqqinnissartik siunertaralugu – annermik pissutigalugu qallunaat oqaasiinik piginnaasaqarluarnissaq kingusinnerusukkut ilinniaqqinnerup iluatsinnissaanut pingaaruteqartorujussuummat. Taamaammat aamma imminut assortuuttutut ippoq, oqaatsitigut piginnaasakinnerit ikerinnakkut unittarnermut peqqutaaqataasutut oqaatigineqarmata, naak taakkorpiaat piginnaasaqarfiginerulernissaat tassaagaluartut inuusuttut efterskoleriarnerinut pissutaanerpaasartut.

Ukioq manna martsip qaammataata aallartinnerani Efterskoleforeningip ukiumoortumik ataatsimiinnerani naapeqatigiinnitsinni ikerinnakkut unittarneq aammattaaq oqallisigisatsinni annertuumik inituvoq. Ikerinnakkut unittarnerit arlalinnik assigiinngitsorpassuarnillu peqquteqarsinnaapput, kisianni pingaarluinnartuuvoq inuusuttut inooqatigiinnikkut, kulturikkut minnerunngitsumillu oqaatsitigut ilikkagassatigullu unamminartunut, avatangiiserisaminnit sungiusimasaminnit ungasissorsuarmiillutik efterskolernerminni naapitassaminnut piareersarluarsimanissaat. Taamaammat isumaqatigiissutigilluarparput suliniuteqartoqartariaqartoq, isumaqatigiippugullu 2018-imi aasarnissaata tungaanut suliniutit marluk uku piviusunngortinnissaat sulissutiginiarlutigit:

  • Danmarkimi efterskolini ilinnialersussanut kalaallinut sapaatip-akunneranik ataatsimik sivisussusilimmik piareersartarneq pilersinneqassaaq. Suliaq tamanna pissaaq Ilinniartitaanermut Aqutsisoqarfiup, Efterskoleforeningip, Kalaallit Illuisa, Peqatigiiffiup Kalaallit Meerartaasa suleqatillu naapertuuttut allat suleqatigiinnerisigut. Piareersarnermut ilaatigut imaritinneqassapput efterskolit aaqqissugaanerannik ilisarititsineq, danskit oqaasiinik ilitsoqqussarinagit oqaatsitut ilinniartitsineq aamma sammisassat attaveqaateqalerfiusut.
  • Efterskoleforeningip aamma Ilinniartitaanermut Aqutsisoqarfiup suleqatigiinnerisigut kalaallinut Danmarkimi efterskolertunut Kalaallit Nunaanni inaarutaasumik misilitsinnerit neqeroorutiginissaannut periarfissat misiligarneqassapput. Aallaqqaammut efterskolini marlunni-pingasuni misiliutitut. Inuusuttut namminneq toqqarsinnaavaat Kalaallit Nunaanni Danmarkimiluunniit inaarutaasumik misilitsinneq peqataaffiginiarnerlugu, ilinniaqqinnissaminnut pisortatigoortumik piumasaqaatit suut piviusunngortittariaqarnerat apeqqutaatillugu.

Tamakku saniatigut isumaqatigiissutigaarput, suliniuteqarfissatut isumassarsiat makku sulissutiginerat ingerlateqqinniarlugit:

1) Kalaallit inuusuttut Danmarkimi efterskolilinnginnerini ilitsersorneqartarnerisa pitsanngorsarnissaa.

- Efterskoleforeningen imaluunniit efterskolinit aallartitat immikkut pisoqartillugu Kalaallit Nunaanni aqqutissiuisut nuna tamakkerlugu nunalluunniit immikkoortuini naapeqatigiinnerini peqataasinnaapput, Danmarkimilu efterskolini periarfissat, efterskolimik toqqaasarneq, ilitsersuinermut atortussat il.il. ilisimatitsissutigalugit.

- Efterskoleforeningip Nuna Tamakkerlugu Ilitsersuisarfik suleqatigalugu, efterskolini ilinniartuunikut, maligassiuisutut inuusuttumiit inuusuttumut ilitsersuisartussat pilersissinnaavaat.

- Ilinniartitaanermut Aqutsisoqarfiup pineqartumut tunngatillugu ingerlassat pisariaqarpallu atortussiorneq tapersissavai. Assersuutigalugu tassaasinnaapput Danmarkimi efterskolertut naatsunik filmiliarineri, qarasaasiakkut attaveqaatit aqqutigalugit siammaanneqartut.

2) Ilinniartunngortitsisarnermi periutsit pitsanngorsarnerat

Ilinniartunngortitsisarnermi periutsit pitsanngorsarumallugit Efterskoleforeningen aamma Ilinniartitaanermut Aqutsisoqarfik suleqatigiissapput, tassuunakkut qularnaarumallugu kalaallit inuusuttut Danmarkimilu efterskolit imminnut naapertuunnerunissaat. Qanoq iliorluni efterskolit ilinniartut ilikkagassatigut, inuttut inooqatigiinnikkullu piginnaasaat pillugit paasissutissinneqartarsinnaanerinut ilusiliussassanik periarfissanillu suliaqartoqassaaq, soorlu atuarfinnit oqaaseqaatinik piniarnikkut aamma assersuutigalugu IT-Reg aqqutigalugu.

3) Kalaallit Nunaanni Danmarkimilu efterskolit paarlaateqatigiittarnerat

Kalaallit Nunaanni Danmarkimilu efterskolit paarlaateqatigiittarnissaannut periarfissat Efterskoleforeningip misissussavai. Paarlaateqatigiittarneq iluaqutaasumik pisinnaavoq pisortat, ilinniartitsisut ilinniartullu misilittakkanik paarlaateqatigiinnerattut, paasisassarsiorluni angalanertut, nunanut allanut angalanertut il.il.

Tamakku saniatigut suliniutit allat arlallit sulissutigineqarsinnaapput, soorlu Kalaallit Illui suleqatillu naapertuuttut allat peqatigalugit angajoqqaanik suleqateqarnermut naleqqiullugu, Danmarkimi attaveqaatinik sammisaqartitsinertigut il.il.

Efterskoleforeningen aamma Ilinniartitaanermut Aqutsisoqarfik, suleqatigisartakkat naapertuuttut allat suleqatigalugit, ingerlaavartumik oqaloqatigiittassapput, suliniutissatut pilersaarutaasut malitseqartinnissaat siunertaralugu. Ilinniartitaanermut ministeri aamma Doris J. Jensen qanittumi ataatsimiinnerminni aamma tamanna piviusunngortinniarlugu suliniuteqartoqassasoq isumaqatigiissutigeqqammerpaat.

Annertunerusumik paasisaqarumasut attavigisinnaavaat: Naalakkersuisup allattaa Rosa Thorsen, tlf. +299 55 33 03 imaluunniit Efterskoleforenigimi nunat tamat pillugit siunnersorti Maren Ottar Hessner. Tlf. +45 33 17 95 89