Sermitsiaq allataanut ”Neqi A/S-ip namminersortut unammillerpai” naqqiut

Sermitsiaq Augustip 25-ani 2017 allataanut ”Neqi A/S-ip namminersortut unammillerpai” naqqiut

Una erseqqissaatigissallugu pingaaruteqarpoq: Neqi A/S Inuussutissarsiornermut, Suliffeqarnermut, Niuernermut, Nukissiuteqarnermullu Naalakkersuisoqarfiup ataaniimmat, Nunalerinermut Naalakkersuisoqarfimmi Suka K. Frederiksenip Naalakkersuisoqarfianiinnani.

Tusarliunneqarpormi Inuussutissarsiornermut, Suliffeqarnermut, Niuernermut, Nukissiuteqarnermullu Naalakkersuisoqarfik saaffiginnissummut pineqartumut iliuuseqarsimasoq (dobbelt tjekkes).

Naalakkersuisoq Suka K. Frederiksen nunalerineq pillugu siunnersortinit attaveqarfigineqarnaniluunniit aaqqiissuteqaqqullugu attavigineqarsimanngisaannarpoq, taamaattorli toqqaannartumik kukkusumik aviisimi allaaserineqarpoq. Naalakkersuisormi Nunalerinermut siunnersortinit attavigineqarsimanngilaq.

Ataatsimeersuartoqarpoq juulip aallartinnerani 2017:

Savaatillit aasaq ataatsimeersuarneranni nunalerinermut soqutiginnittut allat peqatigalugit Naalakkersuisoq peqataavoq. Ataatsimeersuarnermilu pineqartumi SPS aamma peqataavoq, taakkualu qullersaqarfittut oqaasiinnartigut ilaatigut ilisimatitsissutigaat, naatsiianik tigooraanertik ajornartorsiutigigitsik, Naalakkersuisullu neriorsuutigaa taakku oqariartuutaat Inuussutissarsiornermut, Suliffeqarnermut, Niuernermut, Nukissiuteqarnermullu Naalakkersuisoqarfimmut apuukkumaarini – taakkuummatami tamatumunnga akisussaasut. Neriorsuutigineqartorlumi Naalakkersuisumit apuunneqarpoq.

Naalakkersuisoq Suka K. Frederiksen ima ilisimatitsivoq:

”Pingaaruteqarpoq eqqaamaneqassammat suliffeqarfiit Neqi A/S-tut ittut namminneerlutik siulersuisoqarmata, taamatulli aamma pingaaruteqartigaaq sulinerminni paasissutissanik tigussaasunik peqataatitsisussaagamik. Taamatulli aamma pingaartigaaq inuussutissarsiummik atuisut, soorlu Nunalerinermik suliallit naatsiianik tunisassiornerisa qularnaatsumik ingerlanissaat qulakkeertussaagamikku, imaanngitsoq tunisassiassat naammassereernerisa kingorna aatsaat paasilissagaat naatsiianik tigooraaviit millilivigineqarsimanerat”.

Nunalerinermi eqeersimaartumik ingerlanissaq pingaartuuvoq, taamaattumillu savaatillit Qaqortumi ataatsimeersuarneranni ukioq manna pisumi ataani atsiortup oqalugiaataa ilaatigut ima imaqartoq innersuukkusuppara: ”Naalakkersuisut siunertatut anguniagaraat neqilerinerup nunamilu naatitsinerup iluani inuussutissarsiuteqarnikkut imminut pilersornerulernissap anguneqarnissaa”.
Savaatillit, nersutaatillit, tuttuutillit aammalu nunami naatitsinermi suliaqartut suliaminnik ineriartortitsisimanerat nunatsinnut pilersueqataanermik takussutissiivoq. Taamaattumik nunalerinermut siunnersortit sulinerat Naalakkersuisup nukittorsaaqataaffigerusuppaa suleqataanerallu suli annerusumik annertusarusullugu. Naalakkersuisuni ilaasortat inuussutissarsiummik ingerlatsisut attuumassuteqartullu tamaasa soorlu: Kommune, uumasut nakorsaat, savaatillit peqatigiiffiat tamarmik kattullutik nukittunerusumik suleqatigiilluarnissaq anguniartariaqarpaat, pingaaruteqarmammi ataatsimoorluni allorassaaqatigiinnikkut anguniakkat tigussaasumik anguneqarnissaat” Naalakkersuisoq Suka K. Frederiksen oqarpoq.


Naalakkersuisup ilisimaarilluarpaa, naatsiiat pitsaassutsimikkut pitsaavallaanngissinnaanerat, taamatullu aamma quit naatsiianut ilitsiviit pitsaasuunnginnerat pissutaalluni naatsiiat sinerissamut nassiussuunneqartussat pitsaassusaasa pitsaavallaanngittarnerat ilisimaaralugu, taamaattumik sooq pingaartissanngilarput tamatuma qanoq ililluta nukittorsaavigineqarnissaata qulakkeernissaa ilisimaarinissaalu, soorlu nunatta avataaniit naatsiianik tikisinneqartartunik unammillersinnaassusaata pitsaanerulersinnissaa eqqarsaatigalugu.

Taamaattumik Namminiilivinnermut, Nunanut Allanut, Nunalerinermullu Naalakkersuisoqarfik inerniliussatut isumaqatigiissummik Savaatillit peqatigiiffiannik (SPS-imik atsioqatigiissuteqarput, taamaalillutik nunalerinermi inuussutissarsiuteqarnerup annertunerpaamik nunatsinnut iluanaarutaanissaa anguneqarsinnaammat minnerunngitsumillu nukittunerusumik suleqatigiinnerup nassataanik nunap inuussutissarsiuteqaneranut nunamullu iluaqutaassalluni.

Naggasiutigalugu ersarissarneqassaaq Nunalerinermik Naalakkersuisup Suka K.Frederiksen-ip pingaartimmagu pisortat pigisaanni ingerlatsiviit tamarmik assigiimmik inuiaqatigiinnut kiffartuussillutillu periarfissaqartitsissasut.