Polar Seafood A/S nunatsinneersunit pigineqarpoq

Stemningsbillede Aalisarnermut Piniarnermullu Naalakkersuisoqarfiup ilisimavaa nittartakkami www.tusaamasat.dk Franz Petersenimit pigineqartumi, Naalakkersuisoqarfimmi sulisuusimasumit, ingerlatitseqatigiiffimmik Polar Seafoodimik piginnittut pillugit allaaserisarai. Aalisarnermut Piniarnermullu Naalakkersuisoqarfiup piginnittuunermut allaaserineqartut akuersaarsinnaanngilluinnarpai. Taamaammat matumuuna naqqiuteqarluta allagaqarpugut.

Franz Petersen isumaqarpoq Polar Seafood Greenland A/S-ip suliffeqarfissua Danmarkimi najugaqartunit toqqaannartumik pigineqartoq. Franz Petersenip isumaa naapertorlugu aalisarnermut inatsit naapertorlugu Danmarkimi najugaqartuulluni piginnittuuneq unioqqutitsineruvoq.

Franz Petersen nittartakkamini ilaatigut ima allappoq:

“Pisortat allagaataanni atuarneqarsinnaavoq Aalisarnermut Naalakkersuisoqarfiup Kalaallit Nunaanni Akileraartarnermut Aqutsisoqarfimmit imaluunniit Danmarkimi akileraartarnermut qullersaqarfimmit SKAT-imit aamma Danmarkimi inuussutissarsiutit ingerlatsiveqatigiillu pillugit qullersaqarfimmit uppernarsaatit pisariaqartinneqartut piginngikkai. Uppernarsaatit takutinniartussaagaluarpaat Polar Seafoodimik kikkut piginnittuunersoq, soorlu tamanna aamma Naalakkersuisoqarfimmi pisortaanerup atsiugarigaa.”

Tusaamasat.dk-mik piginnittoq Franz Petersen aamma ima allappoq:

”Polar Seafoof Greenland A/S Henrik Leth siuttoralugu Inatsisartunut allappoq Tusaamasat.dk-mi allaaserineqartut eqqunngitsumik tunngaveqarluni allanneqartarsimasut. Tamanna Naalakkersuisoqarfimmi pisortamit Jørgen Isak Olsenimit uppernarsarneqarpoq, Naalakkersuisoqarfiummi pisortaata Polar Seafoodimik piginnittut pillugit allattorsimaffiannut atsioqataanermigut tamanna uppernarsaaqataaffigivaa.”

Nunatsinneersut marluk piginnittuupput
Aalisarnermut Piniarnermullu Naalakkersuisoqarfiup nalunaarutigissavaa Polar Seafood Greenland inunnik marlunnik Kalaallit Nunanni najugaqartunit pigineqarmat. Inuit pineqartut suliffeqarfissuarnut allanut aamma attuumassuteqarpata imaluunniit suliffeqarfinnut allanut aamma piginneqataallutik, suliffeqarfiit Kalaallit Nunaanniittuullutik nunaniluunniit aamma allaniittuullutik, tamanna isumaqanngilaq pisassiissutinik piginnittuunissamut aalisarnermut inatsit naapertorlugu piumasaqaatinut naammassinnissimanngitsut Kalaallit Nunaannilu ingerlatseqatigiiffinnut piginnittuunissamut.

- Ataasiarlungaluunniit Polar Seafoodip tamakkiisumik piginnittuisa allattorsimaffiannut atsiugaqarsimanngilanga. Aalisarnermut Piniarnermullu Naalakkersuisoqarfik taamaallaat nalunaaruteqarpoq Polar Seafood A/S-mik piginnittut, uppernaasaatit tunngavigalugit, tassaammata aalisarnermut inatsit naapertorlugu piginnittuusut. Allaaserisaq atuarlugu allaanngilaq Polar Seafoodimik piginnittut pillugit uanga saqqummiussaqarsimasunga, Aalisarnermut Piniarnermullu Naalakkersuisoqarfiup pisortaanera Jørgen Isak Olsen erseqqissaavoq.

- Polar Seafood Greenlandimik piginnittut uppernarsaataasa takutippaat, aalisarnermut inatsit naapertorlugu piginnittuussuseqartut. Paasissutissamik maajip 18-ianni atsiorluni tunniussisoq tassaavoq pisortanit akuerisaalluni kukkunersiuisoq Lars Brimer Sørensen, Jørgen Isak Olsen oqarpoq.

Pisortaaneq erseqqissaavoq Polar Seafood Greenlandimik piginnittut pillugit pisortat allagaataanni paasiniaanermut piginnittuunermullu uppernarsaatit pillugit saqqummiussinermut attuumassuteqanngilluinnartoqartoq.

Qajaq Trawl A/S
Franz Petersen ima qulequtalimmik aamma allappoq: “Aalisarnermut Naalakkersuisoqarfik ingerlatseqatigiiffimmut 2012-mi atorunnaarsimasumut raajarniarnissaanut akuersissummik million koruunerpassuarnik nalilinnik tunniussaqarpoq”.

- “Aalisarnermut Naalakkersuisoqarfik aamma ingerlatseqatigiiffimmut atorunnaartumut, Qajaq Trawl A/S-mut ukioq manna atorunnaartumut, raajarniarnissaanut akuersissummik tunniussaqarpoq. Qajaq Trawl A/S 2017-imi raajarniarnissamut 5.000 tonsit sinnerlugit akuersissuteqarluni”, Franz Petersen allappoq.

- Matumuuna sakkortunerpaamik erseqqissarusuppara Aalisarnermut Piniarnermullu Naalakkersuisoqarfik ingerlatseqatigiiffinnut atorunnaarsimasunut akuersissutinik tunniussisanngimmat. Suliffeqarfiillu qitiusumik nalunaarsorneqartarfiat naapertorlugu Qajaq Trawl A/S maannakkut nalinginnaasumik ingerlatsivoq. Ilisimanngilluinnarparpullu Franz Petersen tamatumunnga tunngasumik sumit isumassarsisimassanersoq, Jørgen Isak Olsen oqarpoq.

Tupinnarpoq
Aalisarnermut Piniarnermullu Naalakkersuisoqarfik Inatsisartut aalajangigaat naapertorlugit aalisarnermut inatsit tunngavigalugu ingerlatsivoq siulersuillunilu, allaffissornikkut qullersaalluni. Tamatumani aalisarnermut inatsit aamma atuuppoq.

Nunatta aalisarnermut politikki nammineerluni akisussaaffigileramiulli taama aalajangersaasarluni. Ingerlatsineq ukiut ingerlanerini inerisarneqarlunilu misilittagaqarfiulluarpoq.

- Taamaattumik Naalakkersuisoqarfiup tupigusuutigeqaa Franz Petersen Naalakkersuisoqarfimmi atorfeqarnermini nunatsinni namminersortutut suliffeqarfissuaq pillugu ataatsimiittarnerni oqallisigineqartarneranilu peqataasarsimasup Polar Seafood Greenland A/S-mik piginnittut pillugit allatut isummersuuteqarluni allammat, pisortaaneq oqarpoq.

- Taamaassappat Naalakkersuisoqarfik naliliissaaq tamanna atorfeqarnerminut atatillugu nipangiussisussaatitaanerminik unioqqutitsisimassasoq, Jørgen Isak Olsen erseqqissaavoq.

Attavigineqarsinnaavoq Aalisarnermut Piniarnermullu Naalakkersuisoqarfimmi pisortaaneq, Jørgen Isak Olsen. Mail: jio@nanoq.gl