Nunatta kujataani sumiiffiit pilerinaatillit annikitsumik aatsitassarsiornissamut inniminnerneqarput

Nunatsinni annikitsumik aatsitassarsiornissamut soqutiginnittunut nuannersumik nutaarsiassaqarpoq. Nunatta kujataani Uunartup Kangerluanut qanittumi sumiiffiit ujarassiornikkut immikkut soqutiginaatillit marluk annikitsumik aatsitassarsiornissamut inniminnerneqarput. Sumiiffiit marluk annikitsumik aatsitassarsiornissamut inniminnerneqartut tamarmik immikkut 10 km2 km-isut annertussuseqarput. Sumiiffiit kuultinik peqarfiit immikkuullarissut, tikikkuminassutsimikkut annertussutsimikkullu annikitsumik aatsitassarsiornermut soqutiginaateqarsinnaasutut nalilerneqarput.

Annikitsumik aatsitassarsiorluni ingerlataqarnissamut innuttaasunit soqutiginninneq annertusiartuinnartoq eqqarsaatigalugu tunngavissinniarlugulu, sumiiffiit annikitsumik aatsitassarsiornissamut inniminnerneqarput. 2017-imi aasaq tikillugu annikitsumik aatsitassarsiornissamut akuersissutit 58-it tunniunneqareerput, taakkua nunarput tamakkerlugu agguarsimallutik. Naatsorsuutigineqarpoq akuersissutit aamma ingerlatat amerliartornerat ukiuni aggersuni ingerlaannassasoq.

Aatsitassanut Ikummatissanullu Naalakkersuisoq, Múte Bourup Egede, oqarpoq:

Nunaqavissut aatsitassarsiornermik soqutiginnittut amerliartuinnarmata iluarisimaarpara. Taamaalillutik innuttaasut nunatsinni aatsitassat iluaqutigissavaat tamatsinnullu iluaqutaasumik nutaanik ilisimasaqalissallutik inuussutissarsiuteqalissallutillu. Taamaattumik ineriartornermut neriulluarnartumut tassunga Naalakkersuisut tapersersuillutillu tunngavisseerusuttorujussuupput. Taamaattumillu maannakkut Kalaallit Nunaata kujataani sumiiffiit pilerinaatillit marluk annikitsumik aatsitassarsiornissamut inniminnerniarlugit Naalakkersuisut aalajangerput.

Sumiiffiit marluk Nunatta kujataani Uunartup Kangerluata eqqaaniittut annikitsumik aatsitassarsiorluni ingerlataqarnissamut innimernerneqarnerat
Sumiiffiit marluk Uunartup Kangerluata eqqaaniittut annikitsumik aatsitassarsiornissamut inniminnerneqarput. Tassa imaappoq, annikitsumik aatsitassarsiorluni ingerlatassat pillugit qinnuteqaatit kisimik isiginiarneqassapput. Sumiiffinni nalinginnaasumik aatsitassarsiorluni misissuinissaq pillugu qinnuteqaateqartoqarsinnaanngilaq. Qinnuteqaatit Aatsitassanut Ikummatissanullu Aqutsisoqarfimmut septembarip 15-iat ilanngullugu nassiunneqarsimasut sullissinermik isumaginnittumit qinnuteqaataasunik naleqqiussinikkut isumagineqarumaarput.

Annikitsumik aatsitassarsiornissamut akuersissummik pissarsisinnaanissamut, qinnuteqartup minnerpaamik piumasaqaatit makkua naammassisimassavai:

  1. Qinnuteqartoq Kalaallit Nunaanni najugaqartuussaaq – aammalu minnerpaamik ukiut tallimat siornaniittut taamaassimassalluni.
  2. Qinnuteqartoq Kalaallit Nunaannut tamakkiisumik akileraartussaatitaassaaq – minnerpaamik ukiut tallimat siuliini akileraarsimassalluni.

Annikitsumik aatsitassarsiornissamut akuersissummik qinnuteqaateqartarneq pillugu Sullissivimmi annertunerusumik atuarit link una aqqutigalugu: https://www.sullissivik.gl/Emner/Erhverv/Raastof/Smaaskalaordningen_Med_eller_uden_eneret?sc_lang=da-DK

Paasissutissanik annertunerusunik piniarnermi attaveqarfigineqarsinnaapput:

Nadja Vedsted Sembach
Pisinnaatitsissutinut immikkoortortaqarfimmut immikkoortortaqarfimmi pisortaq – Aatsitassanut Ikummatissanullu Aqutsisoqarfik
tlf: 346823, e-mail: navr@nanoq.gl

Jørgen T. Hammeken-Holm
Naalakkersuisoqarfimmi pisortaaneq – Aatsitassanut Ikummatissanullu Naalakkersuisoqarfik
tlf: 346846, e-mail: joeh@nanoq.gl