Nuugaatsiamit Illorsuarniillu qimagussorneqarsut ataatsimeeqatigilluarneqartut

Naalakkersuisut Siulittaasuata Kim Kielsenip Avannaata Kommuniatalu ikaarsaariarnermut ataatsimiititaliaani siulittaasup Palle Jerimiassenip innuttaasut Nuugaatsiamit Illorsuarniillu qimagussorneqarsimasut Uummannami Atuarfik Edvard Krusemi marlunngornermi ualikkut ataatsimeeqatigaat.

Ilaqutariit inisseqqinnissaat, nutaanik inissialiuunnissaat, aalisarnermut piniarnermullu atortussarsinissaat allatigullu ajunaarnersuarmit eqqugaanermi angerlarsimaffigisamit qimagussortinneqartariaqarnermi pisariaqartinneqalersimasut pissarsiarinissaat pillugit Naalakkersuisut Qaasuitsullu Kommuniata ikiuiniarlutik suliniutaasa killiffiannik innuttaasut Nuugaatsiamit Illorsuarniillu qimagussorneqarsimasut oqaluttuunneqarput

Innuttaasut arlallit ataatsimiigiarput apeqqutissallu amerlanngillat. Apeqqutigineqarnerusut tassaapput umiatsiat, atortut pigisallu soorlu pequttat elektronikkikkut atortut atisallu annaaneqarsimasut. Ukioq qallilerpoq silalu nillertilereerluni taamaammallu ilaqutariit oqorsaatissaqartariaqarlutik. Inisseeqqinnissanut nutamillu initaarnissanut periarfissat pilersaarutillu suuneri aamma apeprsuutigineqarput. Innuttaasut aamma ilaqarput nunaqarfimminnut angerlaqqikkusuttunik.

Naalakkersuisut Siulittaasuat Kim Kielsen Avannaatalu Kommuniani ikaarsaariarnermut ataatsimiititaliap siulittaasua Palle Jerimiassen innuttaasut qimagussorneqarsimasut imak oqaluttuuppaat:

”Upalungarsimanissamut Ataatsimiititaliap naliliinera allanngunngilaq: Illorsuit Nuugaatsiarlu suli njussallugit navianartoqartutut isigineqartariaqarput. Taamaammat innuttaasut Nuugaatsiamut Illorsuarnullu uternissaat innersuussutigineqanngilaq. Innersuussut tamanna Naalakkersuisut Qaasuitsullu Kommuniata tusaatissatut tiguaat. Tamanna tunngavigalugu innuttaasut Nuugaatsiarmit Illorsuarniillu qimagussorneqarsimasut ikiorniarlugit sulivugut. Tamanna aamma tunngavigalugu nunaqarfinni sullissiviit assigiinngitsut, soorlu atuarfik, pisiniarfik, innaallagissiorfik, peqqinnissaqarfik il.il. ingerlateqqinneqarsinnaanngillat. Taarsiullugu Namminersorlutik Oqartussat kommunelu innuttaasut eqqugaasimasut ajornartorsiutaannik pisariaqartitaannillu ikiorniarlugit inoqutigiikkaani ataasiakkaani pisariaqartinneqartut aallaavigalugit sulipput, ineqarneq, meeqqat, suliffissat inuunermilu pisariaqartitat allat eqqarsaatigalugit.”

Nuugaatsiami Illorsuarnilu inoqutigiinnit 62-init 13-it inissinneqareersimapput, pingasut namminneq illuminnut isertersimallutik, 17-it INI A/S namminersortumilluunniit attartortitsisartut aqqutigalugit inissarsisimallutik. Inuti pingasut utoqqaat illuanniilersimapput. Inoqutigiit 26-it suli inisseqqinneqanngillat. Taakkunannga aqqanillit kollegianiikkallarput arfineq marlullu ilaquttani ikinngutiniluunniit inisimallutik.

Innuttaasut pineqartut nutaanik sumilu inissaliuunnissaat Namminersorlutik Oqartussanit Qaasuitsullu Kommunianit pilersaarusiorneqaleruttorpoq. Namminersorlutik Oqartussat kommunellu sanaartornissanut 70 mio. kr.-it illukartereerpaat, danskillu naalakkersuisuisa sanaartornissanut atugassanik aamma 30 mio.kr.-nik qinnuteqarniarlutik aalajangersimallutik.

Paasisaqarnerunissamut attavissat:

Tusagassiivimmi pisortaq Paornánguaq Kleist, Naalakkersuisut Siulittaasuata Naalakkersuisoqarfia, mobil +299 55 94 24, e-mail paok@nanoq.gl

Inuussutissarsiornermut pisortaq Hans Peter Lennert, Qaasuitsup Kommunia, mobil +299 54 28 18, e-mail hple@qaasuitsup.gl