Aatsitassanut Naalakkersuisup Hudsonnip aatsitassarsiorfianut takuniaavoq

Aatsitassanut Naalakkersuisoq Múte Bourup Egede Qeeqatalu Kommuniata borgmesteria Malik Berthelsen ullumi aggustip 18-iani Kangerlussuup eqqaani Naajani Hudsonnip aatsitassarsiorfissaminik sanaartorfianut takuniaapput. Hudsonnip anorthositinik qalluinissamik kissaateqarpoq. Anorthosit glasfiberinut, qalipaatinut siunertanullu assingusunut allanut atorneqartarpoq.

Hudsonip Aatsitassanut Naalakkersuisoq piffimmi takuniaatippaa. Aatsitassanut Naalakkersuisoq taamaalilluni umiarsualivissami atortorissaarutissanik, ineqarfissamut kiisalu utaqqiisaagallartumik tupeqarfimmut takuniaavoq. Aatsitassanut Naalakkersuisup periarfissaq iluatsillugu suliniummi sulisut arlallit oqaloqatigai.

Aatsitassanut Naalakkersuisoq Múte B. Egede oqarpoq:

”Hudsonip aatsitassarsiornissamut pilersaarutaa Kalaallit Nunaanni aatsitassarsiorfissanik suliniuteqartuni siuarsimanerpaavoq. Taamaammat suliniutip qanimut malinnaaffiginissaa pingaartippara. Hudsonimut takuniaaninni suliniutip ingerlalluarnera sinaakkutillu piariilivinnerat uppernarsivara.”

Hudson 2015-imi qalluisinnaanermut akuersissummik tunineqarpoq. Hudsonnip kingorna aningaasaliisussat kingullit pissarsiarinissaat suliaraa, aatsitassarsiorfissallu eqqaani atortussanik sanaartorluni.

Anorthositimik qalluiffissap aallaartinnissaanut tunisassiulernissaanullu tunngatillugu Aatsitassanut Naalakkersuisoq Múte B. Egede oqarpoq:

”Hudsonnikkut maanna ukiuni arlalinni suliniumminnik pimoorussillutik suliaqareersimalerput. Taamaammallu aningaasaliisussanut atortussanillu pisariaqartunik sanaartornermi siuarsimallualereerput. Taamaammat Hudsonip piffissami qaninnermi tamakkiisumik aatsitassarsiorfiup tunisassiorfissaata suliarinera naammassiumaaraa ukiorlu qaangiussimalerpat tunisassiornini aallartissinnaajumaaraa Naalakkersuisut naatsorsuutigaat. Kalaallit Nunarput siunissami qaninnermi aatsitassarsiorfinnik marlunnik ingerlatsiviulissasoq suut tamarmik ilimanarsisippaat.”

 

Ukununnga saaffiginnilluni paasissutissat annertunerusut pissarsiarineqarsinnaapput:

Jane Petersen Lantz
Naalakkersuisup allattaa - Aatsitassanut Naalakkersuisoqarfik
Tlf: 346839, E-mail: japl@nanoq.gl

Jørgen T. Hammeken-Holm
Naalakkersuisoqarfiup pisortaa - Aatsitassanut Naalakkersuisoqarfik
Tlf: 346846, E-mail: joeh@nanoq.gl