Namminiilivinnermut immikkoortortaqarfik aviisi sammisaq suliaa siulleq saqqummerpoq

Namminiilivinnermut, Nunanut Allanut Nunalerinermullu Naalakkersuisoqarfiup siullermeerluni aviisi sammisaq pingasunngormat saqqummiuppaa

Namminiilivinnermut, Nunanut Allanut Nunalerinermullu Naalakkersuisoqarfiup siullermeerluni aviisi sammisaq pingasunngormat saqqummiuppaa, aviisilu AG-mut Sermitsiamullu tapiliussatut uani sapaatip-akunnerani ilanngunneqassaaq.

Namminiilivinnermut Naalakkersuisoq Suka K. Frederiksen aviisip saqqummernera pillugu ima oqaaseqarpoq: ”Pingaartippara, namminiiliivinnissamut suliniuteqarnitsinni nunatsinni innuttaasut tamarmik isummersoqataallutillu peqataatinneqartarnissaat. Taamaattumik aviisimi oqallissaarummi innuttaasut nalinginnaasut annertuumik inissaqartinneqarsimapput namminiivilinnissaq pillugu oqalliseqataanissaat pingaaruteqarluinnarmat.”

Aviisimi saqqummersinneqartumi atuarneqarsinnaasut ilagaat inuusuttut ilaata Taitsiannguaq Tróndheimip isummersornera:

”Paasinnittaasera malillugu siunissamut eqqarsariaaserput unammillernarsinnaavoq, immaqalu aatsaat siuariarsinnaavugut siunissamut eqqarsariaaserput aatsaat allanngortereerutsigu”.

Tukumminnguaq Nykjær Olsenip allaaserisaani taamatuttaaq atuarneqarsinnaavoq ima qulequtserneqarsimasoq: ”Ataatsimoorluta nukittuneruvugut.” allaaserisanilu ima nangippaa:

”…Kalaallit Nunaanni namminiivittumi kikkut tamarmik inissaqartillugillu ataqqineqartariaqarput....”

Martin Mølleri Nunarsuarmi pissartanngorniunnernut aamma Olympiamut peqataanikoq ima oqarpoq:

Uannut kalaallit erfalasuat sinnerlugu arpanneq eqqornerusutut misiginartarpoq. Uanga nunami maani peroriartorsimavunga ulluinnarnilu maani sungiusartarlunga, taamaattumik uannut inuttut tamanna isumaqarpoq.”

Aviisimittaaq atuarneqarsinnaapput Qaanaami Tunumilu piniartut taamatullu aamma kujataani savaatillip isummersuutaat.

Namminiilivinnermut Naalakkersuisup Suka K. Frederiksenip siunissamut Kalaallit Nunaata ornitaanut inuiaat imminnut upperinissaat pingaartippaa, soorluttaaq aviisimi ilanngussamini nunatsinni taalliortorsuit Jonathan Petersenip Henrik Lundillu 1916-mi taalliaat qulequtsiukkaa: ”Saperasi isumaqaleritsi”, taamatuttaaq Martin Luther King-ip oqaaserisimasaa ima issuarlugu:

” Upperinninneq alloriarnerni siulliuvoq, naak ilaatigut majuarfissaq tamakkiisoq takusinnaanngikkaluarigut.”

Namminiilivinnermut, Nunanut Allanut Nunalerinermullu Naalakkersuisoqarfik siunissami tusagassiat assigiinngitsukkaat atorlugit avammut tusarliussisarnissani aammattaaq pilersaarutigaa.

Annertunerusumik paasisaqarusunnermi naalakkersuisup allattaa Naasunnguaq Olsen, tlf, 345414-imut, e-mail: nasu@nanoq.gl attaveqarfigineqassaaq