Tuttunniarnermi umimmanniarnermilu maleruagassat atuuttut

Tuttunniarneq aamma umimmanniarneq ingerlasoq pillugu tuttunniarnermi umimmanniarnermilu malittarisassat atuuttut APN-imiit eqqaasitsissutigineqassapput erseqqissaatigineqassallutillu. Piniarneqarnerat 1. aggustimi 2017-imi aallartippoq sunngiffimmilu piniartunut 30. septembari ilanngullugu ingerlassaaq inuussutissarsiutigalugu piniartunut 15. oktobari ilanngullugu ingerlassalluni.

  • Akuersissutit inunnut 16-inik ukioqalereersimasunut taamaallaat tunniunneqarsinnaapput.
  • Akuersissutit inummut atiatigut taasamut taamaallaat atuupput allanullu tun-niunneqarsinnaanatik tunineqarsinnaanatilluunniit.
  • Tuttunik pisaqarnissamut qoorortuut minnerpaamik .222-mik sulloqqortussusillit atoqqusaapput qoorortuullu eqiinnartakkat eqittaannartakkallu atoqqusaanatik.
  • Umimmannik pisaqarnissamut qoorortuut minnerpaamik 6,5 x 55-mik sulloqqortussusillit atoqqusaapput qoorortuullu eqiinnartakkat eqittaannartakkallu atoqqusaanatik.
  • Aallaasit tuttunik aamma umimmannik pisaqarnissamut atoqqusaasut nakersarneqarsimassaaq pitsaasuussallunilu.
  • Tuttunniarnermi umimmanniarnermilu pisarineqartut neqaat tamaat pisaqarfimmiit nassarneqassaaq.
  • Qimmit tuttunniarnermi umimmanniarnermilu nassatareqqusaanngillat.
  • Akuersissutit pisanik nalunaaruteqarnertalerlugit utertinneqarnissaat inatsimmi tunngaveqartumik piumasaqaataavoq.

Kangerlussuup eqqaani umimmanniarnissamut akuersissutit suiaassutsimikkut aalajangerneqareersut aammattaaq erseqqissaatigineqassaaq tassanilu kulavaat aamma norraat piniaqqusaanatik. Nuup aqutsiveqarfiani sunngiffimmi piniartut piniarfinni Akia-Maniitsumi aamma Ameralimmi tuttunik taamaallaat tallimanik pisaqarsinnaapput - tamakkerlugit tuttut qulit. Tamanna pillugu APN-ip piniarfinni pineqartuni nakkutilliineq sakkortusiniarpaa.

Naggasiutigalugu APN-ip inuussutissarsiutigalugu sunngiffimmilu piniartut pisaqarluarnissaanik kissaappai.

Erseqqinnerusumik paasisaqarusukkussi uunga saaffiginnissinnaavusi

Immikkoortortami pisortaq Amalie Jessen amalie@nanoq.gl Tlf. 34 53 04