Timip aalatinnerunissaanik siuarsaanissamut unammisitsinermi peqataagit

Ukiut pingajussaat atuarfimmi, suliffimmi inuiaqatigiinnilu timip aalatinnerunissaanut siuarsaanissamut unammisitsisoqalerpoq. Peqqissutsimut Naalakkersuisoqarfimmit kaammattuummik isumassarsiatsialannik avitseqatigisigut 25.000 kr.-inillu eqquillutit.

-”Atuarfinni, suliffeqarfinni inuiaqatigiinnilu timip aalatinnerunissaanik siuarsaanissamut ukkassisoqartillugu iluaqutissat arlaliupput. Ulluinnarni timip aalatinneratigut inuuneq pitsaanerulersarpoq, ulluinnarni nukissaqarnerulersitsisarpoq nappaatillu arlallit pinngitsoorneqarlutik,” taama oqarpoq Peqqissutsimut Naalakkersuisoq, Agathe Fontain nangillunilu:

-”Iliuutsit allanngortinnissaat timilu aalatinnerulerniarlugu iliuuseqalerneq ajornarsinnaavoq. Kisianni nunatsinni sumiiffinni arlalinni ulluinnarni timi aalatinnerunissaanut assersuutitsialannik nassaarsinnaavugut. Maligassaalluartut taakkua erseqqinnerusumik saqqummiukkusuppavut taamaasillutik allat isumassarsiffigisinnaaniassammatigit.”

Inuiaqatigiinni, atuarfimmi suliffeqarfimmilu ukiumi eqeersimaarnerpaaq novembarip sisamaanni Maligassiuisut Show-imi qinerneqassapput, tassani Kalaallit Nunaanni Timersortartut Kattuffiat Elite Sport Greenlandilu timersornerup silarsuaani maligassatsialannik toqqaassapputtaaq. Ukioq manna nutaatut aliikkusersuinermi Pisiffik suleqatigalugu nuna tamakkerlugu katersuiniartoqassaaq.

Suliffeqarfiit, atuarfiit illoqarfiit nunaqarfiilluunniit timip aalatinnerunissaanik siuarsaanissamut isumassarsialatsiammik peqarpat taava suliniutip allaatigineqarnera naatsumillu filmeeqqamik assinillu pitsaasunik pn@nanoq.gl-imut nassiussigit. Peqataanissamut nalunaarfissaq kingulleq tassaavoq 15. september 2017.

Unammisitsineq pillugu Peqqik.gl-imi atuarnerugit.

Paasisaqarnerorusukkuit Naalakkersuisumut allatsi Nauja Møller attavigiuk mobilikkut +299 58 26 54.