Ilinniartitaanernik aaqqissuusseqqinnermi alloriarneq

Meeqqat inuusuttullu meeqqat atuarfiannik naammassinnereersimallutik unittooratik ilinniakkamik ingerlatseqqissinnaanissaannut suliniummi alloriartoqarpoq. Ilinniartitaanernik aaqqissuusseqqinnissaq Naalakkersuisunit akuerineqarpoq, maannalu “Ilinniartitaaneq ataqatigiissoq eqaatsorlu” anguniarlugu suliniarnermi suleqatigiisitaq suligasuartussaq pilersinneqarsinnaanngorpoq. Suleqatigiisitaq suligasuartussaq aasaq 2019-imi suleriaqqinnissamut innersuussutini naammassisaq Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmut tunniutissavaa.

“Ilinniartitaaneq ataqatigiissoq eqaatsorlu” anguniarlugu sulinerup siunertaraa, inuusuttut ilinniaqqiffimminnik naammassinnittartut amerlanerulernissaat, ilinniarnertuunngorniarfik kiisalu inuussutissarsiuummik ilinniakkat eqqarsaatigalugit. Naalakkersuisut siunertaraat inuusuttuaqqat tamarmik ingerlariaqqiffiusumik ilinniarnissamut periarfissinneqassasut, taamaalillutik inuusuttut ingerlariaqqinngitsoortartut malunnaatilimmik ikileriarniassammata. Ilinniagaq ataqatigiissoq eqaatsorlu ilinniarnertuunngorniarnissamut kiisalu inuussutissarsiuummik ilinniarnissamut pisariinnerusumik ingerlariaqqiffiussooq, 1.-12. Klassinilu ajornannginnerusumik ikaarsaariarfiusinnaalluni.

- Nuannaarutigaara ilinniartitaanernik ataqatigiissumik eqaatsumillu aaqqissuusseqqinnissimik Naalakkersuisut kissaataat maanna aallartimmat, Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq, Doris J. Jensen oqarpoq. Doris J. Jensenip aamma oqaatigaa, Naalakkersuisut kissaatigigaat atuartut nunaqarfinneersut 8. Klassip tungaanut nunaqarfimminniiginnarsinnaalernissaat, taassumalu kingorna illoqarfimmi nunaqarfimmiut allat peqatigalugit, klassini aatsaat aallartittuni atuartalersinnaanissaat.

 

Annertunerusumik paasisaqarusukkuit uunga saaffiginnigit: Naalakkersuisup allattaa, Rosa Thorsen, mobil 553303.