Rubiinit nunatsinnut angerlaanneqarput

Aappaluttumi rubiinisiorfimmi piginnittuusimasut, True North Gems A/S, ukiut misissuiffiusut ingerlaneranni rubiininik Canadamut assartuipput. Taamaaliornermilu misissueqqissaarnissaq patsisaavoq. Rubiinit sapinngisamik pitsaanerpaamik piiarneqarsinnaanerat pillugu paasissutissanik pissarsinissaq siunertaralugu misissueqqissaarnerit ingerlanneqarput. Misissueqqissaarnerit Canadami teknikikkut atortorissaaruteqarnera pissutigalugu ingerlanneqarsimallutik.

Maanna rubiinisiorfimmik piginnittut Greenland Ruby A/S-ip TNG-p piaanissamut akuersissutaanik tigusinemigut aammalu Aatsitassanut Ikummatissanullu Naalakkersusoqarfiup piumasaqarneratigut maanna rubiinit nunatsinnut angerlaassimalerpai. Rubiinit angerlaanneqartut maanna rubiininut piiarneqartunut ilaatillugit tunisassiornermut tuniniaanermullu pilersaarummut ilanngunneqassapput.

Rubiinit nunatsinnut angerlaanneqarnerannut atatillugu Aatsitassanut Naalakkersuisoq Múte Bourup Egede ima oqarpoq:

"Aatsitassaatigut tamatsinnut iluaqutaassapput, aatsitassarsiornermillu ingerlatat kikkunnut tamanut iluaqutaasussanngorlugit ingerlanneqartassapput. Taamaammallu nunatsinni rubiinit piiarneqartut maanna angerlaanneqarnerat nuannaarutigaara."

 

Ukununnga saaffiginnilluni paasissutissat annertunerusut pissarsiarineqarsinnaapput:

Jane Petersen Lantz
Naalakkersuisup allattaa – Aatsitassanut Ikummatissanullu Naalakkersuisoqarfik
Tlf: 34 68 39, E-mail: japl@nanoq.gl

Jørgen T. Hammeken-Holm
Naalakkersuisoqarfiup pisortaa - Aatsitassanut Ikummatissanullu Naalakkersuisoqarfik
Tlf: 34 68 46, E-mail: joeh@nanoq.gl