Danskit naalakkersuisuisa taapiiumanerat isumaqaqaaq

Naalakkersuisut Qaasuitsup Kommunitalu Nuugaatsiami Illorsuarnilu ajunaarnersuaqarnerata kingorna Danmarkimi naalakkersuisut tapersersuiuarnerat nuannaarutigaat.

Statsministerip Lars Løkke Rasmussenip nalunaarutigaa Danmarkimi naalakkersuisut aalajangersimasut inissianut nutaanut eqqugaasimasllu nutaamik inuuneqalernissaannut 30 mio.kr.-nik tapersiinissamut atugassanik Folketingimut qinnuteqarniarlutik.

Naalakkersuisut Siulittaasuat Kim Kielsen Qaasuitsup Kommunianilu borgmesteri Ole Dorph ataatsimoorlutik ima oqaaseqarput:

”Danmarkimi naalakkersuisut 30 mio. kr.-nik tapiiumanerat Namminersorlutik Oqartussat kommunellu innuttaasunut ajunaarnersuarmit qimagussorneqarsimasunut nutaamik inuuneqalersinniarlugit ikiuiniarnerannut isumaqartortorujussuuvoq.

Eqqugaasimasut nutaamik inuuneqalerniarnerat oqimaallunilu akisuvoq. Inigisaq, inuussutissarsiorsinnaaneq, pigisat, atisat il.il. ilaqutariit toqqissisimasumik inuuneqarnisaannut pingaaruteqarput.
Taamaammat innuttaasunut ilaqutariinnullu ikiuiniarnitsinnut Danmarkimi naalakkersuisut tapersersuinerat pingaaruteqarpoq. Neriuppugut Danmarkimi naalakkersuisut pitsaasumik iliuuseqarniarnerat Folketingimit taperserneqassasoq.

Naalakkersuisut sapaatip akunnerata matuma siuliani nalunaaruteqarput suleqatigiissutigalugu 70 mio. kr.-it tassaarsuaqarnerata kingorna inisseeqqinnissanut pilersitseqqinnissanullu atugassat nassaarisimallutigit. Danmarkimit tapiissutigineqartoq ilanngullugu 100 mio. kr.-it missaat atorsinnaalissavagut pingaarnerpaatillugu ilaqutariit eqqugaasimasut inissaqartinnissaannut. Aningaasat taakku atorlugit ilaqutariit eqqugaasimasut ullutsinnut naleqquttunik inissaqartissinnaassavagut pisariaqarpallu nutaanik inissialiortitsisinnaassalluta.”

10 mio. kr.-it GEUS-imut

Danmarkimi naalakkersuisut aamma aalajangerput GEUS-imut tapiissutit 10 mio. kr.-nik ilaniarlugit Kalaallit Nunaanni qaqqani sisoorujussuartoqarsinnaaneranik misissuinernut atugassanik. Tamanna pillugu Naalakkersuisut Siulittaasuat Kim Kielsen ima oqarpoq:

”Nuna tamakkerlugu innuttaasut sumunnarfimminni qaqqanit sisoortoqaratarsinnaaneranik immikkut eqqumaffigisassaqarnersut ilisimasallit naliliisinneqarnissaat kissaatigisimavarput. Danmarkimi naalakkersuisut kissaat tamanna malitseqartimmassuk taamalu GEUS-ip misissuisinneqarnissaanut aningaasaliiniarmata nuannaarutigaara.

Ajunaarnersuaqaqqammernerani politiit, bredskabsstyrelse illersornissaqarfiullu suliniarnerisa innuttaasunut eqqugaasunut qanoq pingaaruteqartigisimanerat takuarput. Tamanna nallerneqarsinnaanngilaq. Kalaallit Nunaat tamaat sinnerlugu soorunami nuannaarutigaara ajunaarnersuaqarnerata kingorna suliniarnerup Danmarkimi naalakkersuisut malinnaaffigiuarmassuk iliuuseqaqataanissamullu piareersimajuarmata.”

Ajunaarnersuarmut tunngatillugu tusagassiorfinnut nalunaarutaasimasut tamaasa uani atuarsinnaavatit.

 

Paasisaqarnerorusuttunut attavissat:

Tusagassiivimmi pisortaq Paornánguaq Kleist, Naalakkersuisut Siulittaasuata Naalakkersuisoqarfia, mobil +299 55 94 24 imaluunniit e-mail paok@nanoq.gl

Pisortaq Hans Eriksen, Qaasuitsup Kommunia, mobili +299 56 49 64 imaluunniit e-mail hae@qaasuitsup.gl