Kujataani nunakkut pisunnissaq inassutigineqanngilaq

Kujataani , minnerunngitsumik Ipiuttap Sillisillu eqqaanni nannumik takusoqarsimammat, kujataata politeqarfiata qullersaqarfiata Qaqortumiittup Kujataani nunakkut pisulluni angalanissaq inassutiginngilluinnarpaa. 

Politiit imaani nunamilu angalasunut aamma mianersoqqusipput nanoq ataasiinnaanngitsoq piffissami kingullermi siumorneqartarsimammat.

Aalisarnermut Piniarnermullu Naalakkersuisoqarfik nannunut ajornartorsiutaasunut, sumiiffimmit qimagutsinneqaraluarlutik sumiiffinnut najugaqarfiusunut uteqqittuartartunut  tunngasumik immikkut ilitsersuuteqarpoq.

Immikkut ilitsersuut naapertorlugu Kujataani pingaartumik upernaakkut aasakkullu nannunik takunnittoqarsinnaasarpoq.

Sumiiffinni nannunik akuttunngitsumik takunniffiusartuni atortut nannunik  qimaatitsissutigineqarsinnaasut nassarneqartariaqarput nannullu alapernaatsut qanoq qimaatissanerlugit ilinniarneqartariaqarluni.

Immikkut ilitsersuut naapertorlugu nannumik siumuisoqarpat nipituumik suartartoqassaaq, nipiliortoqarluni anginerusutullu isikkoqarumalluni tallit aalatinneqassallutik. 

Pitsaanerussaarli, innersuussutigineqartutut nunakkut sumiiffimmiit sumiiffimmut pisulluni angalannginnissaq. 

Takornariartitsiviillu, minnerunngitsumik Kujataani takornariartitsiviit, qinnuivigissavavut, inassuteqaat takornarianut ilisimatitsissutigisaqqullugu.

Uani immikkut ilitsersuut atuarsinnaavat.

Attavigineqarsinnaavoq Aalisarnermut Piniarnermullu Naalakkersuisoqarfimmi pisortaanerugallartoq, Pollas Lyberth. Email: poly@nanoq.gl