Kalaallit Nunaanni Sakialluummik TB-mik akiuiniarneq pillugu WHO-p nalunaarusiaa

Kalaallit Nunaanni sakialluutip TB-ip annertuumik atugaajuarnera pillugu Peqqissutsimut Naalakkersuisoq 2016-imi aasakkut WHO nunatsinnut qaaqquniarlugu suliniuteqarpoq.

Immikkut ilisimasallit WHO-mit, Statens Serums Institut-imit Dansk Lungeforening-imiillu aallartitat Nunatsinni Nakorsaaneqarfimmeersoq, Peqqissutsimut Naalakkersuisoqarfimmeersoq Peqqinnissaqarfimmeersorlu peqatigalugit Tasiilaq, Kulusuk, Nuuk Aappaluttumilu rubiinisiorfik angallavigaat. Kalaallit Nunaanni pissutsit sakialluummillu TB-mik pitsaanerusumik pitsaaliuinissaq akiuinissarlu paasiniaavigaat.

Maanna WHO-mit aallartitat siunissami TB akiorniarlugu iliuusissanik innersuussutitalimmik nalunaarusiorsimalerput. Innersuussutaasut TB-mik akiuiniarluni 2017-miit 2021-imut suliniutissatut siunniussassanut ilanngunneqassapput.

Sakialluutip TB-ip politikkikkut innuttaasullu akornanni ukkanneqartuarnissaa pingaartinneqarpoq.

  • Nappaatip akiorniarneqarnerani piaartumik nappaammik suussusersisarneq kinguneqarluartumillu nakorsaatit atorlugit nakorsaaneq pingaaruteqarluinnarput.
  • Nappaatip tuniluunissaa annikillisinniarlugu sapinngisamik piaarnerpaamik suussusersisinnaajumallugu nakorsarsinnaajumallugulu, ilinniagaqassuseq tunngavigalugu peqqinnissakkut sullissisut ilinniartitaanissaat ilitsersorneqarnissaallu kiisalu ilisimatusarneq pingaaruteqartuarsinnarput.
  • Tamatumunnga atatillugu aaqqissuussamik tunillatsissimasinnaasunik ujartuineq siunnerfilimmillu innuttaasunik tunillatsinnissamut napparsimalernissamullu immikkut navianartorsiorsinnaasunik misisuisitsisarnernik inerisaanissaq innersuussutaapput.
  • Kalaallit Nunaanni pissutsinut immikkut ittunut nassuiaataasinnaasumik, inuttut atukkanik peqqissutsimut sunniuteqartunik TB-ip atugaaneranik nakkutilliinerup annertusineqarnissaa innersuussutaavoq.
  • Nappaat inuttut atukkanik aallaaveqarmat peqqinnissaqarfiullu kisimi akiorsinnaanngimmagu pisortat suliffeqarfiutaat/paaqqinnittarfiit akimorlugit suleqatigiinnissaq pingaaruteqarportaaq.

Nalunaarusiaq uani pissarsiarineqarsinnaavoq: http://www.euro.who.int/en/health-topics/communicable-diseases/tuberculosis/publications/2017/tuberculosis-prevention,-control-and-care-in-greenland.-report-of-a-review-mission-2016

Sukumiinerusumik paasisaqarusuttut attavigisinnaavaat: Henrik Trykker, e-mail hent@nanoq.gl imaluunniit Rikke Bruun de Neergaard, e-mail: rbdn@nanoq.gl